Deputeti Oerd Bylykbashi deklaroi në një dalje për media se 10 emrat e përzgjedhur për KLP dhe KLGJ jo vetëm janë njerëz të afërt të kryeministrit Edi Rama, por kanë dhe probleme të rënda me ligjin.
“Kandidatura në KLGJ/KLP me afilacion të pastër politik, në shumicën e tyre janë në kundërshtim me kriteret e Kushtetutës dhe ligjit, disa janë të skualifikuar nga ONM. Procesi është tërësisht i delegjitimuar. PD nuk kishte dyshim se 10 emrat jo vetëm do të ishin të afërt me kryeministrin Rama, por me probleme të rënda me ligjin dhe Kushtetutën, rrjedhimisht e papranueshme”, tha Bylykbashi.
Eksperti për Çështjet Ligjore në PD, Gazment Bardhi, publikoi emrat e disa kandidatëve për KLGJ dhe KLP, si dhe shkeljet e tyre, ku sipas PD, nuk mungojnë ish-bashkëpunëtorët e Sigurimit të Shtetit apo 'hajdutët e platformave'.
Bardhi: Shkeljet ligjore dhe kushtetuese për kriteret e kandidatëve e bëjnë listën të pavlefshme.
Kandidati për KLGJ nga shoqëria civile Altin Hazizaj ka depozituar deklaratë, ku deklaron se nuk ka qenë i dënuar me vendim gjyqësor të formës së prerë. Është deklaratë e rreme, sepse sipas shkresës së Drejtorisë së Burgjeve dhe Prokurorisë së Përgjithshme rezulton se Altin Hazizaj është dënuar dy herë me vendim të formës së prerë për dy vepra penale.
![](https://shqiptarja.com/template/img/NO_ALFA_Kuadrate shqiptarja.png)
Dokumenti nga sektori i dekriminalizimit për Altin Hazizaj është dorëzuar në Kuvend, por është fshehur për anëtarët e opozitës. Ai duhej të ishte skualifikuar. Kjo e bën listën të pavlefshme.
Sokol Lamaj nuk ka vërtetimin për shlyerjen e detyrimeve tatimore, që është shkelje flagrante për kriteret e kandidatëve që vijnë nga avokatia. Ndaj tij janë marrë masa administrative për mospagesën e rregullt të tatimeve. Ky është kriter ndalues për kandidatët. Edhe ky kandidat e deligjitimon listën. ONM ka konstatuar se nuk provon ligjshmërinë e pasurisë.
ONM ka konstatuar se Ilir Panda ka qenë i përfshirë në nivele të larta politike, çka ligji e ndalon.
Kozma Jano nga radhët e avokatëve, nga dokumentacioni që i është fshehur opozitës, rezulton, se Kozma Jano i datëlindjes 1956 ka qenë bashkëpunëtor i sigurimit të shtetit me pseudonimin “Telefoni.” Kozma Jano ka qenë kryetar i Partisë Komuniste dega Lushnjë dhe në 2011 ka qenë kandidat në zgjedhjet lokale në listën e këshilltarëve. Kjo e dhënë është në faqen e KQZ.
(Kozma Jano informator i Sigurimit të Shtetit, dokumenti i publikuar nga PD)
(Kozma Jano ish-kandidat i Partisë Komuniste për këshilltar në Bashkinë Lushnje)
Alfred Balla në rekomandimin e ONM nuk plotëson kriterin e angazhimit në shoqërinë civile në 5 vitet e fundit. Platforma e këtij kandidati është plagjiaturë e një kandidati tjetër. (Plarent Ndreca). ONM thotë se ky kandidat nuk ka integritetin e duhur për të qenë kandidat.
d.c./shqiptarja.com
![](https://www.shqiptarja.com/template/img/sh_logo1.png)