Aktualisht Shqipëria gjendet në periudhën e epidemisë së Gripit. Viruset që qarkullojnë këtë vit janë AH1N1pdm09 dhe AH3N2 të cilët janë të përfshirë në vaksinën e Gripit.
Sipas mejkëve gripi nuk duhet të neglizhohet dhe që në shenjat e para të shfaqjes së tij konsultohuni me mjekun e familjes dhe mjekun pediatër.
“Mjeku i familjes dhe pediatri duhet të vlerësojë me seriozitet të gjitha shenjat me të cilat çdo i sëmurë dyshohet i infektuar me virusin e Gripit. Gripi sezonal është një infeksion viral akut, i cili përhapet lehtë nga njeriu tek njeriu. Gripi mund të prekë çdo njeri në çdo grupmoshë”, deklaroi Bregu.
Virusi i Gripi transmetohet nga njeriu tek njeriu me spërkla gjate teshtimave, kollitjes apo gjatë bisedimit me një person të infektuar. Më rrallë një individ mund infektohet me virusin e gripit duke prekur objekte të kontaminuara nga virusi dhe pastaj individi të prekë gojën apo hundën me duart e infektuara.
Periudha e inkubacionit zgjat nga 1-4 ditë. Një individ i prekur nga virusi i gripit, mund të infektojë të tjerët 1 ditë parashfaqjes se simptomave, gjatë periudhës së sëmundjes. Pra, një person i prekur nga virusi i gripit mund të transmetoje virusin një personi tjetër përpara se ai ta kuptoj që është i sëmurë,
Shenjat më të zakonshme të gripit janë:
Temperaturë e lartë e menjëhershme, kollë që mund të jetë e thatë, rrjedhje të hundëve, dhimbje fyti, anoreksi, lodhje, dhimbje koke, të përziera, diarre, të vjella, dhimbje barku, si dhe dhimbje muskulare.
Çfarë mund të bëjmë për tu mbrojtur nga virusi i gripit
Vaksinimi me vaksinën kundër gripit, Masa parandaluese për përhapjen e virusit të gripit si dhe Përdorimi i medikamenteve antiviral. Të dhënat tregojnë që medikamentet kundër gripit, oseltamivir dhe zanamivir (inhibitore te neuraminidazes) vijojnë të kenë të njëjtin efikasitet sikurse vitin e kaluar. Por ato mund te perdorën vetëm me rekomandimin e mjekut kur ai e vlerëson të nevojshëm
Mënyra më efikase për parandalimin e virust të gripit stinor është vaksinimi me vaksinën kundër gripit.
* Vaksinimi çdo vit është i rëndësishëm, pasi viruset e gripit janë të paparashikueshëm dhe në ndryshim të vazhdueshëm, si dhe imuniteti i krijuar nga vaksina bie me kalimin e kohës.
* OBSH nëpërmjet Qendrës Evropiane për Kontrollin dhe Parandalimin e Sëmundjeve rekomandon kryerjen e një vaksine ndaj gripit çdo vit, si mjeti më efikas për tu mbrojtur nga gripi.
Vaksina e gripit mund të reduktojë: Sëmundjet Akute Respiratore të Rënda, komplikacionet në të sëmurët kronik, vizitat tek mjeku, mungesat në punë dhe në shkollë si dhe parandalon shtrimet në spital .
* Vaksina kundër gripit stinor këshillohet të bëhet në popullatën në risk të lartë si:
* Fëmijët mbi 6 muajsh
* Gratë shtatzëna
* Individë që janë të prekur nga sëmundje kronike të tilla si: astma, sëmundje pulmonare, kardiovaskulare diabeti, sëmundje kronike të mëlçisë , persona me insuficencë renale si dhe individët e moshës mbi 65 vjeç
* Punonjësit shëndetësore
* Punonjësit që shërbejnë në shtëpitë e të moshuarve
* Personat me aftësi të kufizuara
Nuk duhet të vaksinohen me vaksinën kundër gripit: Individë qe kanë alergji nga veza, individë që shfaqin temperaturë akute, individë që kanë pasur reaksione të mëparshme vaksinale si dhe fëmijët nën 6 muajsh.
Veprimet e praktike të cilat ndihmojnë në parandalimin e përhapjes së virusit të gripit
* Mundohuni të evitoni për aq sa është e mundur kontaktet e afërta me individë të sëmurë.
* Nëse jeni të sëmurë qëndroni në shtëpi për të paktën 24 orë.
* Nëse jeni të sëmurë evitoni kontaktet me të tjerët pasi virusi i gripit është shumë ngjitës.
* Mbuloni hundën dhe gojën me një shami kur të teshtini dhe kolliteni dhe hidheni më pas në vend të sigurt.
* Lani duart shpesh me ujë dhe sapun, ose përdorni solucione duarsh me alkool.
* Mos prekni sytë, hundën dhe gojën me duar të kontaminuara, pasi virusi përhapet në këtë mënyrë.
* Pastroni dhe dezinfektoni sipërfaqet dhe objektet që mund të jenë kontaminuar nga virusi.
Konsultohuni me mjekun për përdorimin e medikamenteve.
* Medikamentet kundër gripit mund të përdoren vetëm nëse jeni të sëmurë me grip, dhe të rekomanduara nga mjeku.
* Medikamente kundër gripit duhet të fillohen brenda 48 orëve të para të fillimit të sëmundjes për të pasur efektivitet të lartë.
* Medikamente kundër gripit mund ta bëjnë sëmundjen më të butë si dhe të shkurtojnë kohën e sëmundjes. Ato mund të parandalojnë edhe komplikacionet e rënda që mund të vijnë nga gripi.
Kujdes, ilaçet kundër gripit jepen vetëm me rekomandim
Redaksia Online
(Shqiptarja.com)
![](https://www.shqiptarja.com/template/img/sh_logo1.png)