Prej 10 shkurtit të vitit 2025 kur kryetari i Bashkisë së Tiranës u arrestua me urdhër të SPAK, kjo e hënë e 29 qershorit, 1 vit e 4 muaj më pas, është e para herë që Erjon Veliaj la qelinë e paraburgimit të Durrësit me leje të posaçme. Arsyeja, është ardhja në jetë e djalit të tij të dytë, me bashkëshorten Ajola Xoxa.

Siç Report Tv mëson, dy prokurorët që po e hetojnë kryebashkiakun, Ols Dado dhe Altin Dumani, miratuan leje për 48 orë.

Burimet thonë se leja është dhënë vetëm për të qenë i pranishëm në maternetin publik “Koço Gliozheni” në Tiranë, aty ku erdhi në jetë djali. Në këtë gëzim familjar, Erjon Veliaj është i shoqëruar nga punonjës të policisë së Burgjeve. Sipas lejes, ai do të vizitojë bashkëshorten dhe foshnjën vetëm në ambientet e maternitetit dhe më tej në përfundim të kohëzgjatjes së caktuar, do të rikthehet sërish i shoqëruar nga forcat e burgjeve në qelinë e paraburgimit në Durrës.

Mjekët thonë se djali gëzon shëndet të plotë. Siç bluzat e bardha thonë për Report Tv, edhe Ajola Xoxa, e pandehur gjithashtu në të njëjtën dosje me kryebashkiakun, me masë detyrim paraqitje, është në gjendje të mirë shëndetësore, dhe nuk ka pasur asnjë komplikacion.  Çifti janë gjithashtu prindër të një djali, Kajan, i cili erdhi në jetë në tetor të vitit 2018.

Qytetari i parë i Tiranës dhe bashkëshortja e tij po gjykohen në proces normal, të ndarë nga të pandehurit e tjerë me gjykim të shkurtuar. Të dy janë deklaruar të pafajshëm për akuzat e ngritura nga SPAK, për korrupsion pasiv, pastrim parash, mosdeklarim pasurie, e shpërdorim detyre.