Eskorta qeveritare, Çuko: Vështirë të
gjesh truprojë me gjatësinë e Ramës

TIRANE- Ruajtja e personaliteteve të larta shtetërore është një detyrë ligjore e Gardës së Republikës, ku me ndryshimet në qeveri, Parlament, ka filluar dhe lëvizja e eskortave shoqëruese.
 
Sipas ligjit për mbrojtjen e personaliteteve këtë privilegj e gëzon Presidenti i Republikës dhe Kryeministri, Kryetari i Kuvendit, Zëvendëskryeministri, Ministri i Rendit, Prokurori i Përgjithshëm, Ministrat, Kryetari i Gjykatës Kushtetuese, Kryetari i Gjykatës së Lartë, Drejtori i Shërbimit Informativ Shtetëror, Guvernatori i Bankës së Shqipërisë, Kryetari i Kontrollit të Lartë të Shtetit, Kryetari i Bashkisë së Tiranës, si dhe lideri i partisë opozitare.
 
E ndërsa jemi mësuar që ish-kryeministrin Sali Berisha ta shohim me një numër të lartë shoqëruesish, njëherazi dhe ish-kryetaren e Parlamentit Jozefina Topalli, sipas Arben Çukos ish-drejtuesi i Gardës, njëherazi deputet i Partisë Socialiste, tashmë këto figura Garda do t’i ruajë sipas ligjit por me një numër të kufizuar shoqëruesish.
 
Çuko thotë se Garda ka nevojë urgjente për një pastrim, pasi më 21 janar të 2011 ky institucion u kthye në bandë vrasëse.
 
Për sa i përket kryeministrit, Z.Edi Rama, Çuko shprehet se për Ramën do të jetë vështirë të gjendet një truproje fizike.
 
Për sa i përket shoqëruesve, ligji parashikon që ish-funksionarët publikë të kenë një numër të kufizuar, ku ish-Presidenti dhe ish-kryeminstri do të kenë nga 4 shoqërues, ndërsa ish-Kryetari i Kuvendit dhe ish-ministri i Rendit nga 2 shoqërues.

Redaksia Online
(e.s/shqiptarja.com)