Facebook-ut i dërgohet peticion
për njohjen e Kosovës

PRISHTINË -  Ilirian Salihu, një i ri nga Kosova, ka nismuar një peticion me anë të të cilit i kërkohet bosit të Facebook-ut, Mark Zuckerberg, njohja e Kosovës nga ky komunitet.
Në këtë rrjet social, Kosova ende vazhdon të trajtohet si vend në kuadër të Serbisë.

Siç bën të ditur RTV21, në peticion tregohet se "Kosova është shtet i pavarur, që nga viti 2008 dhe njohja nga Facebook do të mirëpritej nga banorët e Kosovës. Për një peticion të tillë nevojiten 29,492 nënshkrime derisa peticioni po shpërndahet nëpër rrjete sociale".

Në peticion thuhet: "Është e rëndësishme për popullin e Kosovës, që të njihet nga bota dhe komuniteti i gjerë i Facebook-ut. Gjërat nuk janë të lehta këtu dhe pas luftës ishte një lloj rilindje në vendin tonë. Kosova është njohur nga shumë shtete, përfshirë Shtetet e Bashkuara të Amerikës, Franca, Japonia, Italia, Gjermania dhe shumë të tjera. Pavarësia është shpallur në muajin shkurt të vitit 2008 derisa mori përkrahjen e Gjykatës Ndërkombëtare të Drejtësisë.

Së fundi, Google e ka vendosur Kosovën në harta të ndryshme dhe ne do të dëshironim, që edhe Facebook ta bënte të njëjtën gjë. Për shembull, kur kosovarët të publikojnë diçka në Facebook në qytetin e Prishtinës, fjala tjetër është “Serbia”, por qyteti i Prishtinës nuk është më në Serbi, që nga vitit 2008. Ne do të ishim shumë mirënjohës, nëse kjo gjë e vogël do të ndryshohej, një gjë e vogël, por shumë e madhe për shqiptarët".

Për të nënshkruar peticionin klikoni në linkun e mëposhtëm:

http://www.change.org/petitions/facebook-add-the-country-kosovo-on-facebook-the-country-exist-since-2008?utm_campaign=autopublish&utm_medium=facebook&utm_source=share_petition

Redaksia Online
(mag/shqiptarja.com)