'Lufta' për vulën e partisë/ Kalaja: Protesta nuk është presion ndaj gjykatës! Avokati i PD në Apel: Nëse rrëzohet vendimi i Zhukrit, partia i mbetet Bashës dhe Alibeajt

Caktimi i datës së protestës së rradhës të opozitës, në datë 3 mars, ditën kur gjykata e Apelit vendos për fatin e drejtimit të PD-së, është konsideruar si një presion i Berishës ndaj gjykatës.

E ftuar në studion e emisionit ‘Repolitix’ me gazetarin Denis Minga në Report TV, avokatja Adriana Kalaja tha se caktimi i datës së protestës ishte totalisht i zakonshëm, duke mos pranuar se po bëhet persion ndaj gjykatës së Apelit që të rrëzojë vendimin e Agron Zhukrit.

“Është zgjedhur një ditë siç u zgjodh 11 shkurti, 13 shkurti apo 16 shkurti. Me protestë nuk del njëherë në shesh dhe rrëzon Ramën. Protestat e shpeshta sistematike e vënë nën siklet qeverisjen. Nuk është më i qetë, faktet e tregojnë këtë. Me këtë objektiv u thirr edhe ajo e nesërmja. Protesta e 3 marsit nuk do jetë për presion ndaj gjykatës, por duke e lidhur me protestën, edhe gjykata të shohë se kush është opozita”-tha Kalaja.

LEXO EDHE:
GJKKO i hoqi 'arrestin shtëpiak' Berishës, Kthupi në 'Repolitix': Praktikë gjyqësore, dosja ka shkuar për hetim, Berisha nuk prish më provat! Gazetari: Bien akuzat e PD për kapje të drejtësisë

Ndërsa, Rezart Kthupi, avokati që do të përfaqësojë PD-në e Alibeajt në seancën që do zhvillohet në gjykatën e Apelit, duke e sqaruar të gjithë çështjen tha se në rast se gjykata rrëzon vendimin e Zhukrit atëherë PD i mbetet Bashës dhe Alibeajt.

“Gjykata e Apelit e ka ankimimin të depozituar. Ka pasur një muaj kohë për t’u njohur me pretendimet e palëve. Nëse nuk ka surpriza, është vetëm debat mbi provat me të cilët gjykata njihet tashmë. Ankimi ynë është 70 faqe, gjykata nuk ka risi.  Mjafton vetëm vendimi i zhbërjes së Zhukrit që partia t’i mbetet Bashës dhe Alibeajt”-u shpreh avokati.

Nga ana tjetër, avokati Leonard Karaja tha se nëse gjykata e Apelit do të shqyrtojë me themel provat e paraqitura dhe të gjihë procesin, atëherë është e pamundur që vendimi të jepet brenda 3 marsit. Ai tha se mundësia e vetme që Apeli të marrë vendim në 3 mars është vetëm nëse i jep të drejtë vendimit të Agron Zhukrit për njohjen e Kuvendit të 11 dhjetorit.

“Nëse do kërkoni një gjë të tillë nuk përfundon dot atë ditë nëse gjykohet me themel. Kjo histori përfundon atë ditë vetëm nëse i jep të drejt vendimit të Zhukrit. Çdo lloj vendimi tjetër ose e rrëzon ose rikthim aktesh në shkallën e parë me gjyqtarë të tjerë. Nëse nuk e pranon, duhet të dimë si do e rrëzojë, duke kthyer akte në gjykatën e shkallës së parë, do të thotë që gjyqi fillon me themel nga e para. Apo do pranojë se vetë gjykata e Apelit që ajo vetë ta gjykojë me themel një çështje të pagjykuar në themel në shkallë të parë”-tha Karaj.

Në 3 mars, gjykata e Apelit ka caktuar seancën ankimimin e bërë nga Enekelejd Alibeaj kundrejt vendimit të Agron Zhukrit të marrë në 25 mars ku u njoh kuvendi i 11 dhjetorit i organizuar nga Berisha. Në të njëjtën datë, ish kryeministri, Sali Berisha njoftoi edhe një protestë me qëllim largimin e Ramës, e cila është parë edhe si një lloj presioni i bërë ndaj gjykatës.

B.V/Shqiptarja.com

TAG:
• Lufta brenda PD
• rezart kthupi
• leonard karaj
• denis minga
• repolitix
• adriana kalaja