/ATSH-ANSA/ - Xhihadistët e ISIS-it të provincës siriane të Rakas kanë shpërndarë një video në internet ku shihen pamje nga një stërvitje ushtarake fëmijësh, sipas faqes së internetit, Site, që monitoron xhihadizmin në web.
Në video fëmijët kërcënojnë se "do të vrasin presidentin Obama".
Në këtë video duket një fëmijë me një kapuç të zi në kokë dhe i ulur pranë një peme, me një kalashnikov në duar.
Nga pamjet dhe nga zëri duket që djali mund të jetë 8-10 vjeç.
Në një tjetër moment, duket i njëjti fëmijë i shtrirë në tokë që gjuan me një mitraloz të rëndë.
Fotogramet e publikuara në Twitter tregojnë disa fëmijë (10-12), të veshur njësoj, por me fytyra të mbuluara dhe të gjithë me kalashnikovë në duar.