Shqipëria bën pjesë tek vendet që kanë të ardhurat më të ulëta për frymë në Evropë, por kjo nuk i zbraps shqiptarët të shpenzojnë për artikujt e luksit. Festat e fundvitit janë një moment i artë për tregtarët, po për të blerë artikujt e kushtueshëm, shqiptarët kursejnë tek produktet ushqimore.

“I kursejnë njerëzit për vitin e ri, jo tapete jo rrugica, çmimet janë të arsyeshme por blerjet kanë rënë”, shprehet tregtarja.

Dhuratat simbolike mes familjarësh e të afërmish nuk do të mungojnë as këtë fundvit. Po ccfarë kanë menduar shqiptarët të dhurojnë më së shumti? 

Në krye të listës qëndrojnë dhuratat e personalizuara, duke nisur nga argjentaritë apo celularët me kërkesë që mbetet gjithmonë në rritje.

“Me këtë krizë që është, shqiptarët blejnë produkte luksi dhe ka më shumë fluks për Vit të Ri. Vijnë emigrantët blejnë argjend e flori për fejesa e martesa. Përsa i përket telefonave janë moshat 16-24 vjeç që i preferojnë për festa dhe janë prindërit ata që paguajnë”, tregojnë tregtarët.

Sipas të dhënave të INSTAT në tremujorin e tretë të 2017-s, tregtia me pakicë e ushqimeve dhe pijeve u rrit vetëm me 1.7%, teksa shitja e artikujve joushqimorë u rrit me 4.5%, niveli më i lartë që nga tremujori i fundit i 2016-s. Indeksi i tregtisë me pakicë të pajisjeve elektroshtëpiake dhe pajisjeve të ndryshme kompjuterike u rritën në tremujorin e dytë me përkatësisht 6.1% dhe 16.7%, tendencë kjo që duket se ka vijuar edhe në tremujorin e tretë.

Er.K/Shqiptarja.com