Zjarr masiv në Gjirin e Lalëzit, evakuohen pushuesit nga një hotel! Flakët nën kontroll! Neutralizohet vatra pranë Parkut Arkeologjik të Apolonisë

Emirjan Bafti administrator i njësisë administrative të Ishmit, ka folur në një lidhje live për Report Tv, lidhur me situatën e zjarrit në Gjirin e Lalzit.

Bafti tha gjatë fjalës së tij se flakët janë vënë nën kontroll, ndërkohë që forcat zjarrfikëse do të qëndrojnë gjithë natën në terren, me qëllim mos-lejimin e përhapjes së flakëve.

Ai tha gjithashtu se dyshohet për zjarrvënie të qëllimshme dhe flakët sipas Baftit kanë nisur në disa hambarë bujqësorë.

“Kemi edhe një vatër aktive, të tjerat janë shuar. Besoj që zjarrvënia është e qëllimshme. Për momentin nuk rrezikohet resorti turistik. Janë evakuuar njerëzit. Banesat janë larg resorteve. Kemi pasur 4 vatra aktive... Fillimi i zjarrvënies ka qenë te hambarët bujqësore. Një shtëpi që rrezikohej, i evakuam banorët. Situata është nën kontroll dhe zjarrfikëset do të qëndrojnë në gatishmëri gjithë natën”, tha mes të tjerash Bafti.

Kryebashkiakja e Durrësit, Emirjana Sako, ka reaguar për zjarrin e rënë mbrëmjen e sotme në zonën e Shën Pjetrit në Gjirin e Lalzit.

Përmes një reagimi në rrjetet sociale, Sako ka shkruar se për arsye sigurie dhe për të garantuar jetën e qytetarëve, është kryer menjëherë evakuimi i plotë i të gjithë personave që ndodheshin në një kompleks turistik dhe në një banesë private pranë zonës së rrezikut.

Po ashtu, Sako u ka bërë thirrje qytetarëve dhe vizitorëve në zonë të ndjekin udhëzimet e autoriteteve dhe të shmangin lëvizjet e panevojshme drejt zonës së prekur nga zjarri.

Reagimi i Sakos:

Një zjarr me përmasa të mëdha ka përfshirë zonën e Shën Pjetrit në Gjirin e Lalzit. Përhapja e shpejtë e flakëve është favorizuar edhe nga era e fortë.

Strukturat zjarrfikëse të Bashkisë Durrës dhe ato të emergjencave kanë ndërhyrë menjëherë në terren dhe prej disa orësh po vijojnë operacionin intensiv për vënien nën kontroll të situatës dhe parandalimin e përhapjes së mëtejshme të zjarrit.

Për arsye sigurie dhe për të garantuar jetën e qytetarëve, është kryer menjëherë evakuimi i plotë i të gjithë personave që ndodheshin në një kompleks turistik dhe në një banesë private pranë zonës së rrezikut.

Në këtë operacion masiv janë angazhuar kapacitete të shumta njerëzore dhe logjistike në nivel rajonal e kombëtar. Forcat operative në terren përbëhen nga:

• Bashkia Durrës (MZSH): 4 mjete zjarrfikëse dhe 1 autobot.

• Ndërmarrjet e Bashkisë Durrës: 3 autobote mbështetëse.

• Bashkia Tiranë (MZSH): 2 mjete zjarrfikëse dhe 1 autobot.

• Bashkia Shijak (MZSH): 1 mjet zjarrfikës.

• Bashkia Kavajë (MZSH): 1 mjet zjarrfikës.

• Bashkia Kamëz (MZSH): 1 mjet zjarrfikës.

• Agjencia Kombëtare e Mbrojtjes Civile (AKMC):

3 mjete zjarrfikëse dhe 40 forca të nisura në mbështetje.

Operacioni mbetet i vështirë për shkak të shtrirjes së gjerë të flakëve, por ekipet operacionale po punojnë pa ndërprerje për izolimin e plotë të vatrave. Bashkia Durrës, në koordinim të ngushtë me Ministrinë e Brendshme, Mbrojtjen Civile dhe të gjitha shërbimet e emergjencës, po ndjek hap pas hapi situatën dhe mban në gatishmëri të plotë të gjitha kapacitetet e saj deri në normalizimin e plotë të situatës.

Ju bëjmë thirrje qytetarëve dhe vizitorëve në zonë të ndjekin udhëzimet e autoriteteve dhe të shmangin lëvizjet e panevojshme drejt zonës së prekur.

Një zjarr masiv ka rënë sonte në Gjirin e Lalëzit.

Flakët iu janë afruar edhe një hoteli, paraprakisht nuk paraqet rrezik.

Specialistët që ndodhen në vendgjarje shprehen se për fikjen e zjarrit duhet ndërhyrje nga ajri.

Një zjarr ka rënë ditën e sotme në fshatin Lazarat të Gjirokastrës. Ka qenë ora 20:00 ku u konstatua zjarri në fshatin Lazarat, ndërkohë që forcat zjarrfikëse me të mbërritur në vendngjarje, u ndeshën me një zjarr me përmasa të konsiderueshme, i cili rrezikonte edhe banesat përreth.

Forcat zjarrfikëse ndërhynë menjëherë për izolimin e flakëve, duke bërë të mundur ndalimin e përhapjes së tij në drejtim të banesave.

Aktualisht, zjarri është nën kontroll dhe forcat zjarrfikëse po vijojnë punën për shuarjen e plotë të tij dhe eliminimin e çdo vatre të mbetur.

Pas zjarrit pranë parkut të Apolonisë ministri Blendi Gonxhja në një prononcim për mediat tha se zjarri mund të jetë i vendosur nga njeriu dhe jo i shkaktuar nga temperaturat.

“Aksioni për fikjen e zjarrit po vijon. Kemi forca të shtuara nga toka dhe ajri. Me temperarua kaq të ulëta nuk mund të kemi një zjarr të tillë. Shkak është gabimi njerëzor, policia po heton. Nuk është dëmtuar asnjë monument brenda parkut”, tha Gonxhja.

Një zjarr ka rënë ditën e sotme në fshatin Jorgucat të Bashkisë Dropull të Gjirokastrës.

Burime për Report Tv bëjnë të ditur se flakët nisën pas rënies së një rrufeje në majën e malit dhe u përhapën me shpejtësi.

Menjëherë në terren u angazhuan zjarrfikësit, të cilët po luftojnë me flakët, që po favorizohen edhe nga era e fortë.

Një zjarr i përmasave të mëdha ka përfshirë edhe fshatin Delisuf, në Njësinë Administrative Novoselë, në Vlorë.

Burime për Report Tv bëjnë të ditur se flakët, të favorizuara edhe nga era e fortë, janë përhapur me shpejtësi në zonë, ndërsa zjarrfikësit vijojnë përpjekjet për shuarjen e tyre.

Nga zjarri janë përfshirë kryesisht sipërfaqe me pemëtari, ndërsa flakët kanë përfshirë edhe një stallë bagëtish.

Fatmirësisht, në momentin e rënies së zjarrit nuk ka pasur bagëti brenda, por balla bari për bagetinë.

Pamjet tregojnë sipërfaqe të mëdha të djegura, ndërkohë në operacionin për shuarjen e zjarrit janë angazhuar edhe banorë të zonës, të cilët po punojnë krah zjarrfikësve për të vënë nën kontroll flakët.