Bashës e Berishës u ikën krahu i djathtë i Xhelal Mziut, pranon të bëhet deputet (FOTOT)

Krahu i djathtë i Xhelal Mziut, mbështetës i Lulzim Bashës e Sali Berishës në kauzat e opozitës, ka dalë kundër vendimit të djegies së mandateve, duke pranuar të futet në Kuvendin e Shqipërisë.

Korab Lita, zëvendëskryetar i Bashkisë së Kamzës, bastion i Xhelal Mziut që e drejton Kamzën prej tre mantesh, ka dorëzuar këtë të enjte në Komisionin Qendror të Zgjedhjeve, formularin e vetëdekalrimit. Pritet që në mbledhjen e radhës të KQZ-së ai të marrë zyrtarisht mandatin për tu betuar më tej në Kuvend. Korab Lita vjen nga lista e kandidatëve të PD-së në zgjedhjet parlamentare të 2017-ës, në qarkun e Tiranës, dhe pritet të zëvendësojë në Kuvend, aleatin e Bashës, Dashamir Shehin, kryetarin e LZHK-së.

Korab Lita bëhet kështu anëtari i 100 i parlamentit. Deri më tani, pa emrin e tij opozita e re në Kuvend ka 20 deputetë, ndërsa bashkë me 79 mandatet e mazhorancës kuvendi aktual ka 99 deputetë. 

Lita është mbështetës i fortë i PD-së çka e shfaq edhe në rrjetet sociale. E ka deklaruar gjithmonë hapur votën e tij për PD-në ku shfaqet në fotografi me dy gishta para kutisë së votimit. Ka marrë pjesë në protestën e opozitës kundër qeverisë në atë që u quajt çadra pra kryeministrisë. Ka foto të afërt me kryetarin demokrat Lulzim Basha, ndërsa nuk mungojnë edhe takimet miqësore duke konsumuar kafe në lokal në prani edhe të kryebashkiakut Xhelal Mziu. Raport të ngushtë duket të ketë edhe me ish-kryeministrin Sali Berisha, pasi nuk ka nguruar së shfaquri me foto një takim që ka pasur me ish-deputetin demokrat Berisha, në zyrën e këtij të fundit.  AI mban postin e zëvendëskryetarit të Bashkisë së Kamzës prej shkurtit të vitit 2016, por nuk dihet nëse njëjtë siç ka bërë Basha duke i përjashtuar nga grupi deputetët që ndenjën në Kuvend, Myslim Murrizin dhe Rudina Hajdarin, edhe Xhelal Mziu të marrë të njëjtin vendim 'dënimi' ndaj zëvendësit të tij.

 

G.M./Shqiptarja.com

TAG:
• kqz
• opozita e re
• korab lata