Me afrimin e zgjedhjeve të brendshme të 23 majit në Partinë Demokratike edhe gjakrat duket se po nxehen. Sali Berisha dhe Ervin Salianji shkëmbyen në distancë akuza të ashpra. Kreu i PD-së artikuloi me radhë në një bashkëbisedim me qytetarët, lidhjet që sipas tij, Salianji ka me personazhe të njohur të botës së krimit. I pari, Ergys Agasi, biznesmeni në kërkim i dosjes AKSHI.

"Verën e kaloi me Ergys Agasin në dreka dhe darka. Në një kohë kur unë Ergys Agasin e kisha sulmuar me qindra herë si koordinator i karteleve të drogës", tha Berisha. 

Në përgjigje nga rrjetet sociale, Salianji foli për konspiracion në dënimin e tij për kallëzim të rremë për çështjen Babale.

"Sa për Gysrat, pyet fare afër teje si i kanë ndarë pazaret, përfshirë edhe ndërhyrjen te gjykata për dënimin tim", iu përgjigj Salianji. 

I radhës, që sipas Berishës po e ndihmon Ervin Salianjin në foltoret me demokratët, Suel Çela, edhe ky anëtar i krimit në kërkim.

"Në Elbasan, sallën ia mbushi Suel Çela. Këtu je i përjashtuar, i thashë. Kjo është vija e kuqe. Krimi s'do mund kurrë dot këtë parti", vijoi Berisha me akuzat. 

"Dil e fol për Ermal Beqirin, për lejet e familjarëve të tu në Lalëz, në gjysmën e Tiranës, në jug e kudo në Shqipëri", iu përgjigj Salianji nga rrjetet sociale. 

Të dy demokratët akuzojnë njëri-tjetrin për takime të mundshme me dy të burgosur, Oltion Bistrin, ish-drejtues policie dhe biznesmenin që ai akuzohet se i jepte informacione, Pëllumb Gjoka.

"Ervin Salianji nuk po merrem këtu në drekat dhe darkat me Oltion Bistrin në burg dhe Pëllumb Gjokën, sepse banorë të burgut janë", tha Berisha. 

"Për Olti Gjoken që përmend, t’i themi disa gjëra: kur erdhe në burg, nuk erdhe të më takoje mua, por kërkove të takoje këta. Nuk është faji im që edhe këta i kishe gënjyer dhe nuk të dolën në takim", iu përgjigj Salianji. 

Kreu i PD-së flet për tradhti e bashkëpunim të ish-deputetit me elementë të PS-së, ndërsa Salianji deklaroi se Berisha ndan pazaret me Edi Ramën.

"A mund t’i imagjinosh ti që përsëri ka mentor Taulant Ballën? Vazhdon darkon me Taulant Ballën", i tha Berisha. 

"Të kuptoj që unë jam problemi yt, sepse me Ramën je ulur këmbëkryq për reforma, je ulur për leje, licenca, koncesione, përfitime", thotë Salianji. 

Berisha aludoi se Salianji u ble nga kundërshtarët pikërisht për të minimizuar skandalin me zëvendëskryeministren Belinda Balluku. Por, sipas ish-deputetit akuzat e Berishës vijnë nga frika për garën brenda PD-së.

Rendit zhvillimet sipas orarit:
Ora 14:01
Darka me Ergys Agasin? Salianji i përgjigjet Berishës: Ata pranë teje më futën në burg

1776616188_ervinsalianji.jpg

Ish-deputeti Ervin Salianji i është përgjigjur Sali Berishës, pas akuzave që ky i fundit i hodhi se i shërben krimit dhe PS. Përmes një statusi në Facebook, Salianji shkruan se Sali Berisha shpik armiq nga frika për garën brenda PD-së. Ky sulm sipas Salianjit, është prej faktit që një pjesë e lidershipit ka humbur besimin e njerëzve dhe po i trembet çdo zëri ndryshe. Ish-deputeti thekson se nuk është pjesë e pazareve, por përballë pushtetit, ndryshe nga sa thotë ai për Berishën.

Në përgjigje të akuzave se takohet me Ergys Agasin, biznesmenin në kërkim të dosjes AKSHI, Salianji për herë të parë akuzon njerëz fare pranë Berishës, se kanë ndërhyrë të gjykata për dënimin e tij.

"Sa për gysrat, pyet fare afër teje si i kanë ndarë pazaret, përfshirë edhe ndërhyrjen te gjykata për dënimin tim. Për Olti Gjoken që përmend, t’i themi disa gjëra: kur erdhe në burg, nuk erdhe të më takoje mua, por kërkove të takoje këta. Nuk është faji im që edhe këta i kishe gënjyer dhe nuk të dolën në takim", shkruan Salianji. 

Reagimi i plotë i Ervin Salianjit

Përgjigje Sali kolltukut; 36 vite në pushtet në kurriz të demokratëve i kanë krijuar mendësinë që kushdo ka detyrim të jetë skllav i tij.

Nuk ka asgjë më të vjetër në politikë sesa kur dikush që ka humbur lidhjen me realitetin përpiqet të shpikë armiq për të fshehur frikën nga gara.

Të më krahasosh me këdo tjetër është mënyra më e lehtë për të shmangur thelbin: sot problemi nuk janë demokratët që duan fitore, por fakti që një pjesë e lidershipit ka humbur besimin e njerëzve dhe po i trembet çdo zëri ndryshe.

Unë nuk kam përfunduar në “krahët” e askujt. Isha dhe jam i lirë, siç edhe sot po them atë që të gjithë mendojnë: e përbuzin Sali kolltukun për uzurpimin që i ka bërë Partisë Demokratike, por e shajnë me rrënjë e degë vetëm në tavolina. Nuk kam qenë dhe nuk do të jem kurrë pjesë e pazareve. Kam qenë përballë pushtetit, jo në shërbim të tij. Dhe për këtë kam paguar çmim personal.

Ata që sot flasin për “fate” të të tjerëve duhet të shohin fatin e tyre politik: një lidership që nuk frymëzon më, që nuk fiton më dhe që i shmanget çdo përballjeje reale.

Kur nuk ke përgjigje për dështimin, shpik histori.

Kur nuk ke mbështetje, sulmon këdo që ngrihet.

Të kuptoj që unë jam problemi yt, sepse me Ramën je ulur këmbëkryq për reforma, je ulur për leje, licenca, koncesione, përfitime. Dil e fol për Ermal Beqirin, për lejet e familjarëve të tu në Lalëz, në gjysmën e Tiranës, në jug e kudo në Shqipëri.

Sa për gysrat, pyet fare afër teje si i kanë ndarë pazaret, përfshirë edhe ndërhyrjen te gjykata për dënimin tim. Për Olti Gjoken që përmend, t’i themi disa gjëra: kur erdhe në burg, nuk erdhe të më takoje mua, por kërkove të takoje këta. Nuk është faji im që edhe këta i kishe gënjyer dhe nuk të dolën në takim.

Lulzim Bashën e solle e mbajte dhe ta fali partinë. Me mua i ke bërë hesapet gabim: do të çmontoj ty dhe autokratin e qeverisë. Regjimi Rama-Berisha është i përbuzur nga shqiptarët! Dhe meqë ke mbështetje, dil në garë, mos u fshih si frikacak.

SI.E./Shqiptarja.com