LIVE- Turqia merr avantazhin në 'Fadil Vokrri', Akturkoglu i shënon Kosovës! Miqtë kryesojnë 0-1 në finalen play-off të Kupës së Botës 2026

Tensioni nuk mungon në stadiumin “Fadil Vokrri” para Kosovë - Turqi. “GazetaDemos” raporton se disa tifozë turq janë arrestuar nga policia për shkak të trazirave të shkaktuara. Kosova ëndërron të luajë në Botërorin e parë të saj. Ndërkohë Turqia kërkon të rikthehet në këtë kompeticion pas 24 vitesh mungesë, teksa ka qenë tre herë në Kupën e Botës.

Paçka se sot janë rival në fushë, tifozët e Kosovës dhe Turqisë kanë festuar së bashku në rrugët e Prishtinës. Nuk ka munguar flamuri i UÇK-së, ai kombëtar dhe ai i Kosovës. Hyrja për në stadium vijon, ndërsa të dyja skuadrat kanë mbërritur në 'Fadil Vokrri'.

Trajneri Franco Foda nuk e ka ndryshuar formacionin fitues nga ndeshja e pesë ditëve më parë në Sllovaki (3-4). Edhe për sot kundër Turqisë ekipi startues është i njëjtë, ndërsa në stol kanë mbetur emra si Edon Zhegrova dhe Milot Rashica.

Formacioni zyrtar i Kosovës:

Kosova (5-3-2): Muric; Vojvoda, Dellova, Hajrizi, Hajdari, Gallapeni; Hoxha, Rexhbecaj; Muslija; Asllani, Muriqi Trajner: Franco Foda

Presidenti Bajram Begaj ka uruar fitoren për Kosovën, e cila sonte përballet me Turqinë për të siguruar një vend në Botëror.

“Me zemër në Prishtinë. Forca, Kosovë!”, shkruan Begaj krah një postimi në rrjetet sociale.

Sfida nis në orën 20:45 në stadiumin “Fadil Vokrri” në Prishtinë, ku janë drejtuar mijëra tifozë edhe nga Shqipëria.

Kosova do të synojë të zgjasë serinë e pamposhtur në shtëpi në të gjitha garat, e cila aktualisht është tetë ndeshje; që nga humbja 0-3 ndaj Rumanisë në Ligën e Kombeve në shtator 2024. Pritet të shihet nëse turqit do ta 'marrin' stadiumin.

Prishtina sot është kthyer në qendrën e shqiptarisë, pasi shqiptarët nga çdo vend i botës kanë udhëtuar për në kryeqytetin e Kosovës. 'Dardanët' kanë mundësinë që me fitoren kundër Turqisë të jenë në grupet e Kupës së Botës 2026.

Interesi ka qenë i madh, teksa shqiptarët i sheh me veshje patriotike, tupana dhe flamuj kombëtar. Mes tyre nuk mungojnë as tifozët e Turqisë dhe deri në këto momente nuk raportohet për incidente. Çdo rrugë në Prishtinë duket se është në festë, me ndeshjen që nis në orën 20:45 në stadiumin 'Fadil Vokrri'.

Stadiumi 'Fadil Vokrri' ka afërsisht 14 mijë ulëse dhe sot do duket shumë i vogël krahasuar me interesin e madh të shqiptarëve për të ndjekur nga pranë përfaqësuesen e Kosovës e cila luan kundër Turqisë për një vend në Kupën e Botës 2026.

Ndeshja finale ka zgjuar interesin e mijëra shqiptarëve të Shqipërisë, të cilët janë bashkuar me shqiptarët e Kosovës dhe jo vetëm, në Prishtinë. Tanimë ka nisur festa dhe tifozët dëgjohen në kor të thonë 'Kosova është zemra e Shqipërisë'. Me flamujt kombëtar, ato të Kosovës dhe këngë e valle tradicionale, shqiptarët janë në festë.

Kosova e futbollit është një ndeshje larg nga ëndrra për të marrë pjesë në grupet e Kupës së Botës 2026. Sot në Prishtinë luhet finalja kundër Turqisë, ndërsa mijëra tifozë nga Shqipëria kanë udhëtuar drejt kryeqytetit të Kosovës.

Edhe kreu i Federatës Shqiptare të Futbollit, Armand Duka, ka motivuar 'Dardanët'.

"Ndoshta sot mund të ishim dy… por edhe kështu, jemi një. Me krenarinë që na dha Shqipëria dhe shpresën që na jep Kosova, Forca djemtë tanë", shkruan Duka.

Kujtojmë se sot luan edhe kombëtarja e Shqipërisë, por një miqësore kundër Ukrainës (20:45 në Valencia), kjo pasi kuqezinjtë u eliminuan në gjysmëfinalen play-off nga Polonia pesë ditë më parë.

Ditëlindja e 27-të e ka gjetur Edon Zhegrovën në një ditë që mund të jetë historike për futbollin e Kosovës. Ylli dardan i Juventusit mbush 27 vjeç dhe te Kosova ka pasur festë para ndeshjes kundër Turqisë e cila luhet sot në orën 20:45 në 'Fadil Vokrri'.

Kapiteni Vedat Muriqi i ka sjellë tortën e festës Zhegrovës, e këtë të fundit që ka fikur 'qirinjtë'.

'Shpresoj që sot të marrim një dhuratë të madhe, për mua dhe për të gjithë ne në Kosovë, siç do ishte kualifikimi në Botëror', tha Zhegrova, ndërkohë që shokët e ekipit dhe stafi e uruan në kor.

Sot në pikën kufitare të Morinës kanë dalë 17,539 qytetarë shqiptarë të cilët kanë hyrë në Kosovë prej orës 08:00-16:00. Gjithashtu janë regjistruar 7,816 automjete në këtë interval kohor. Shifra e lartë lidhet me ndeshjen Kosovë-Turqi ku shumica janë tifozë.

Ndërkohë janë regjistruar 5,207 qytetarë që kanë hyrë në Shqipëri dhe 2,213 automjete.

Përfaqësuesja e Kosovës në futboll luan sot kundër Turqisë në Prishtinë, në një ndeshje që mund të jetë historike për 'Dardanët'. Të gjithë shqiptarët sot janë me sytë nga futbollistët e Kosovës, ndërsa edhe ambasada e SHBA-së në Prishtinë bën tifo për djemtë e Franco Fodës.

"Nga të gjithë ne në Ambasadën e SHBA-së, po ju brohorasim, luani fuqishëm dhe bëjeni Kosovën krenare", shkruan Ambasada e SHBA-së në Kosovë në kanalet e komunikimit. Përfaqësuesit e SHBA-së në Prishtinë mbajnë veshur edhe fanellat e Kosovës teksa pozojnë.

Qindra tifozë nga Shqipëria janë nisur drejt Prishtinës për të ndjekur nga afër dhe për të përkrahur Kombëtaren e Kosovës në ndeshjen ndaj Turqisë që do të zhvillohet në stadiumin “Fadil Vokrri”.

Të pajisur me flamuj kombëtarë dhe flamuj të UÇK-së, tifozët shqiptarë kanë krijuar një atmosferë entuziazmi dhe mbështetjeje të madhe që në rrugëtimin e tyre drejt kryeqytetit të Kosovës.

Aktualisht, shumë prej tyre ndodhen në pikën kufitare të Vërmicës, në anën kosovare të doganës, ku po presin për të hyrë në Kosovë dhe për të vijuar udhëtimin drejt Prishtinës.

Fluksi i madh i automjeteve që vijnë nga Shqipëria ka sjellë krijimin e radhëve në kufi, megjithatë burime nga terreni bëjnë të ditur se pritjet deri tani nuk janë të gjata dhe lëvizja po vijon normalisht.

Prania e madhe e tifozëve nga Shqipëria edhe në këtë sfidë dëshmon edhe një herë lidhjen e fortë shpirtërore dhe sportive mes shqiptarëve në të dy anët e kufirit, duke e kthyer këtë ndeshje në një festë të përbashkët kombëtare.