Faqja “Nišlije” në Facebook ka publikuar një video të deputetit socialist Pjerin Ndreu, më 1 gusht të këtij viti ku ka pasur një debat me disa policë serbë.

Në shkrimin bashkangjitur videos shkruhet: Shqiptarët po tallen me zë të lartë dhe regjistrojnë para Kuvendit tonë me flamurin e tyre me shqiponjë.

Deputeti Ndreu ndodhet në makinë i shoqëruar nga disa persona të tjerë, para parlamentit serb duke bërë një foto me flamur. Ngjarja është parë nga një qytetar serb, i cili është është ankuar tek efektivët që po patrullonin. 

Policia ka ndërhyrë duke i thënë që diçka e tillë konsiderohej provokim. Pas disa çastesh diskutimi mes Ndreut dhe policëve gjithçka është sqaruar dhe ka kaluar pa asnjë incident. 

Pjesë nga biseda mes policëve dhe deputetit Ndreu:

Ndreu: Në Serbi kam qenë disa herë. Nuk po bënim asgjë të paligjshme.

Polici: E di. Por kjo gjë quhet provokim. 

Ndreu: Nuk është problemi ynë. 

Mbi ngjarjen ka reaguar edhe vetë deputeti, i cili ka sqaruar mediat se ai nuk është ndaluar nga policia serbe.

Sipas tij, dy miqtë e tij kishin dalë nga makina për të bërë foto para parlamentit të Serbisë dhe kanë bashkuar duart duke bërë simbolin e shqiponjës, ndërsa ai kishte qëndruar në makinë.

Jemi sqaruar aty në moment, pa asnjë incident dhe kemi vazhduar rrugën tonë. Nuk është ndaluar askush, aq më pak unë!

Pjerin Ndreu, deputet