Franca e shqetësuar me numrin
e azilkërkuesve nga Kosova

BËRDO - Presidentja e Republikës së Kosovës, Atifete Jahjaga u takua dje në Bërdo, Slloveni, me presidentin e Republikës së Francës, François Hollande.
 
Presidentja Jahjaga e falënderoi Presidentin Hollande për mbështetjen që Republika e Francës i ka dhënë Kosovës para, gjatë dhe pas luftës në procesin e rindërtimit dhe të shtetndërtimit, si dhe në forcimin e konsolidimin e shtetësisë së Kosovës, bën të ditur "Koha Ditore".
 
Presidentja Jahjaga tha se Kosova është një rrëfim suksesi i qytetarëve dhe institucioneve të saj, si dhe i bashkësisë ndërkombëtare dhe theksoi se konsolidimi ndërkombëtar i Kosovës gjithashtu po bëhet me ndihmën e miqve të saj, përfshirë edhe Francën.
 
Ajo tha se është me rëndësi qëndrimi i vendeve anëtare të BE-së, posaçërisht i atyre që ende nuk e kanë njohur pavarësinë e Kosovës dhe lëvizja drejt pranimit të shtetit të Kosovës do të ndihmonte në avancimin e proceseve integruese të vendit, njofton Presidenca .
 
Presidenti i Republikës së Francës,  François Hollande, shprehu interesimin e tij për zhvillimet në Kosovë, për procesin e ndërtimit të shtetit të së drejtës, si dhe për proceset e integrimit në BE.
 
Ai posaçërisht u interesua për zhvillimin ekonomik të Kosovës dhe kapacitet e saj, si dhe ndihmën që Franca dhe BE-ja mund të japin në këtë drejtim.
 
Presidenti Hollande po ashtu shprehu brengën për numrin në rritje të azilkërkuesve nga Kosova në Francë duke thënë se kjo çështje po shkakton probleme dhe po i jep shtetit një imazh të shëmtuar.
 
Redaksia Online
(mag/shqiptarja.com)