TIRANE- “…Kërkon macja të pijë uthull…”. Kjo është shprehja që i ka hedhur “benzinë” debatit të lindur mes Kostandin Xhuvanit dhe shtetasit tashmë të vrarë Edison Jaho, ish-snajperistit të Batalionit të Operacioneve Speciale të Ushtrisë. Gjatë administrimit të dëshmive të personave të pranishëm në lokalin ku ndodhi masakra me katër persona të vrarë, sipas prokurorisë së Tiranës, i vetmi që ka treguar ngjarjen në mënyrë të kthjellët ka qenë Albano Ballcaj. Ky i fundit djalë teze i viktimës Arbër Demiraj, ka rrëfyer të plotë të gjithë skemën e vrasjes.

Sipas tij gjithçka ka nisur për një konflikt për qerasje me pije alkoolike, kërkesë kjo që është bërë nga Kostandin Xhuvani. Sipas rrëfimit të Ballcaj, 26-vjeçari Xhuvani kishte njohje me Jahon që ndodhej në një tavolinë ngjitur me ta.