Fyle – Haxhinastos: Ktheni
integrimin në axhendë
Kukan: Koha ikën, zgjedhjet afrohen
Berisha: Bllokimi i Ramës pa precedent

BRUKSEL - Komisioneri për Zgjerimin dhe Politikat e Fqinjësisë, Stefan Füle takoi sot Edmond Haxhinasto, zëvendëskryeministër dhe Ministër i Punëve të Jashtme të Shqipërisë. Sipas njoftimit zyrtar nga Brukseli, Komisioneri Füle dhe ministri Haxhinasto diskutuan për zhvillimet e fundit të proçesit të integrimit të Shqipërisë në Bashkimin Evropian.
Komisioneri Füle komentoi hapat pozitivë të muajve të fundit, forcimin e bashkëpunimit midis qeverisë dhe opozitës në kuadër të reformave institucionale. Gjatë takimit ai nënvizoi: “ Një dialog politik konstruktiv do të bëjë të mundur që Shqipëria të japë rezultate konkrete për zbatimin e marrëveshjes politike të nëntorit të kaluar, veçanërisht përsa i përket reformës zgjedhore dhe reformës së rregullores së proçedurave parlamentare. Shqipëria duhet ta çojë më tej përparimin e bërë për përmbushjen e 12 prioriteteve kyçe të Opinionit të Komisionit, duke theksuar në mënyrë të veçantë krijimin e një historiku të besueshëm në fushën e sundimit të ligjit si dhe në luftën kundër korrupsionit.”
Duke përsëritur angazhimin e Komisionit Evropian dhe mbështetjen e plotë të këtyrë përpjekjeve, Komisioneri Füle ftoi Shqipërinë të përqendrohet në reformat gjithëpërfshirëse të cilat janë të nevojshme për arritjen e objektivit kombëtar të integrimit evropian. Ai përfundoi: “Unë do të doja të theksoja edhe një herë se, që të ketë sukses në agjendën e BE-së, për një vend është e rëndësishme që kjo të kthehet ne një agjendë kombëtare, për qeverinë, për opozitën dhe për shoqërinë civile. Një proçes i vërtetë dhe gjithëpërfshirës është çelësi për suksesin e Shqipërisë në përpjekjen e saj reformuese.”

(aq/shqiptarja.com)