Gary Neville para finales: Argjentina luan për Messin, Portugalia s'e bëri për Ronaldon

Cristiano Ronaldo vijon të bëjë lajm me lënien në stol gjatë dy ndeshjeve të fundit me Portugalinë dhe eliminimit të luzitanëve nga Kupa e Botës. Legjenda e Manchester United dhe ish-bashkëlojtari i CR7, Gary Neville është shprehur për Daily Mail se ndryshe nga Argjentina që luan për Messin, te Portugalia nuk e bënë një gjë të tillë për Ronaldon.

“Gjithçka në lojën e Argjentinës sillet rreth Lionel Messit dhe ata luajnë sa më shumë që të jetë e mundur për të përfituar nga aftësitë e tij. Mendova se Fernando Santos do të bënte të njëjtën gjë me Cristiano Ronaldon, i cili është dikush që e njeh prej kohësh. Më duket se diçka ndodhi gjatë garës që i ndryshoi planin dhe Fernando Santos mendoi “Duhet ta lë jashtë Ronaldon”. Kur la jashtë Cristianon, i cili nuk është çdo lojtar, u bë lajm global. Në fund më erdhi keq për Ronaldon, duke parë dikë si ai duke qarë në tunel. Nuk është kurrë një foto e mirë. Ne e dimë se çfarë po mendonte. “Kaq, nuk do të luaj më kurrë në një Botëror”, ka thënë ish-lojtari i "Djajve të Kuq" në një prononcim për Daily Mail.

S.DH/Shqiptarja.com

TAG:
• cristiano ronaldo
• gary neville
• katar 2022