Kristian Prenga ishte shumë pranë njërës prej surprizave më të mëdha në historinë e peshave të rënda në boks, duke rrezikuar të mposhtte me 'K.O' Anthony Joshuan dhe të prishte përballjen e shumëpritur me Tyson Furyn. Megjithatë, në raundin e dytë, shqiptari u mund me nokaut teknik. Tashmë, Prenga ka reaguar ndaj dyshimeve se ndeshja me Joshuan ishte e 'kurdisur'.

Boksieri shqiptar, deri atëherë pak i njohur për publikun e gjerë, e goditi Joshuan pastër që në 20 sekondat e para të duelit në Jeddah, duke e rrëzuar dy herë kampionin e dyfishtë të botës me një uppercut të befasishëm.

Joshua arriti të mbijetonte dhe t'i rezistonte presionit të Prengës, i cili dukej shumë pranë një fitoreje që do t'i ndryshonte karrierën.

Megjithatë, në raundin e dytë, ritmi i Prengës ra ndjeshëm. Në vend që të vazhdonte ofensivën që i kishte sjellë sukses në raundin e parë, 35-vjeçari u tërhoq në mbrojtje, duke i dhënë Joshuas kontrollin e qendrës së ringut.

Si pasojë, britaniku rifitoi besimin dhe e ndëshkoi Prengën me një kombinim të fuqishëm prej tre goditjesh, duke i dhënë fund ëndrrës së shqiptarit për një fitore historike.

Pas ndeshjes, disa tifozë vunë në dyshim mënyrën se si ndryshoi rrjedha e duelit, duke hedhur dyshime se përballja mund të kishte qenë e 'kurdisur'. Edhe prezantuesi i TalkSPORT, Simon Jordan, shkroi në rrjetet sociale se "diçka nuk ishte në rregull".

Prenga reagoi ashpër ndaj këtyre pretendimeve, duke i cilësuar ato si të pabaza.

"Komentet e Simon Jordan për 'kurdisje' janë marrëzi të pastra. Janë krejtësisht të pavërteta dhe të papërgjegjshme. As unë dhe as Anthony Joshua nuk do të përfshiheshim kurrë në diçka të tillë. Boksi im është i pastër", tha Prenga.

Ai shpjegoi edhe arsyen pse ndryshoi strategjinë në raundin e dytë:

"Ndjeva se duhej të ruaja energjitë dhe të merrja frymë. Mendova ta nisja më qetë raundin e dytë për të rikuperuar forcat. Fatkeqësisht, kjo nuk funksionoi dhe ritmi më i ulët i dha Joshuas mundësinë të merrte kontrollin e ndeshjes", vijoi boksieri shqiptar.

Ndërkohë, Simon Jordan më vonë zbuti qëndrimin e tij, duke pranuar se kishte ndryshuar mendim pasi kishte biseduar me njerëz të njohur të botës së boksit.

Pas kësaj fitoreje, Anthony Joshua pritet të përballet me Tyson Furyn në muajin nëntor në Madison Square Garden (New York), ndërsa njoftimi zyrtar pritet të bëhet së shpejti.

Nga ana tjetër, Kristian Prenga do të vazhdojë karrierën nën menaxhimin e kompanisë Matchroom Boxing të Eddie Hearn, ku pritet të zhvillojë edhe ndeshjen e tij të ardhshme.