"Gërdeci", Sekretarja e Aldo Bumçit
implikon Shkëlzen Berishën, dëshmia

Anjola Agolli, ish sekretarja e Ministrit të Drejtësisë, Aldo Bumçi, në dëshminë e saj dhënë prokurorëve implikon direkt Shkëlzen Berishën, djalin e ish kryeministrit, Sali Berisha, në demontimin e armëve në Gërdec.  
 
Agolli ka pranuar se ajo ka dërguar faksin me shënimin “Për Shkëlzen Berishën…” në një numër faksi të Ministrisë së Mbrojtjes, dhe kujton se, "Shkëlzen Berisha erdhi në zyrë dhe u takua me ministrin para se të niste faksin..."
 
Sekretarja Anjola Agolli shpjegon procedurën si e ka protokolluar faksin dhe si është dërguar ai në Ministrinë e Mbrojtjes. Bëhet fjalë për një faks privat që Ministri Aldo Bumçi i ka dërguar për informim Shkëlzen Berishës, për t'i kujtuar se ia ka firmosur “Memo”-n që aprovonte biznesin e tij në Gërdec.
 
Kopja origjinale kishte shkuar me post në Ministri, ndërsa faksi për Shkëlzen Berishën ishte dërguar në një zyrë të një njeriu të besuar të tij që ja dorëzonte.
 
Dëshmia e Sekretares së Ministrit të Drejtësisë është marrë brenda gjithë rregullave nga Prokuroria, por Shkëlzen Berisha nuk u thirr kurrë në prokurori.
 
Fabrika e demontimit të armëve në Gërdec shpërtheu në 15 mars të vitit 2008, duke shkaktuar vdekjen e 26 personave si dhe plagosur dhjetëra të tjerë.  

Redaksia online
Shqiptarja.com

TAG:
• aferat e klanit berisha