Budallallëku njerëzor shfaqet më së shumti në gojën e atyre që e shesin veten se janë inteligjentë. Belind Këlliçi, i njohur si Belo, dje bëri debutimin e tij në Komisionin Parlamentar të Ligjeve me tonin e tij qesharak prej “hetuesi”, duke bërë gjithsesi gafën e zakonshme. I bindur se kishte zbuluar ndonjë skandal kundër ish-kryetares së KLGJ-së, Naureda Llagami, në të vërtetë ai vetëm konfirmoi dyshimet për korrupsion në procesin e privatizimit të ish-Klubit Partizani, ku janë të pandehur Sali Berisha dhe dhëndri i tij Jamarbër.

Sipas akuzës së Belo Këlliçit, familja Llagami, në të cilën bën pjesë edhe Naureda Llagami, do të kishte marrë nga drejtësia “vetëm për 4 vjet” një kompensim ekonomik prej rreth 3 milionë dollarësh për 9.500 metra katrorë tokë të sekuestruar nga regjimi komunist në vitin 1945. Sipas Këlliçit, këta pronarë nuk e meritonin ta zgjidhnin kaq shpejt çështjen e tyre gjyqësore, pasi një qytetar normal “e zgjidh për 15 deri në 20 vjet”, dhe se kjo “shpejtësi” do të ishte arritur vetëm falë faktit që Naureda Llagami ka qenë kryetare e KLGJ-së.

Denoncimi, tipikisht populist, fshehu megjithatë disa pika thelbësore, sipas një teknike ku Belo është bërë tashmë specialist, madje më i keq se mësuesi i tij, Sali Berisha. Vetëm për të dhënë përshtypjen e një “hetuesi të mirë”, Këlliçi fsheh detajet më të rëndësishme të historisë dhe kështu gënjen.

Pika e parë është se nuk është e vërtetë që familja e Naureda Llagamit (emri i së cilës, në fakt, nuk figuron fare në procesin për tokat) ka marrë atë kompensim prej 3 milionë dollarësh: shuma është ndarë mes 13 trashëgimtarëve, dhe babai i Nauredës, që është një prej tyre, ka marrë vetëm pjesën që i takonte nga kuota e tij e trashëgimisë. Por, kjo nuk është pika më e rëndësishme.

Gënjeshtra është që kompensimi nuk është marrë në vetëm 4 vjet, por në 24 vjet. Vendimi që u jep trashëgimtarëve të Sabrie Llagamit të drejtën për kompensim mbi ato 9.500 metra katrorë daton më 16.06.1996 dhe është vendimi nr. 667 i KKKP-së së Tiranës, ndërkohë vendimi i fundit i Gjykatës së Lartë është te data 19.9.2024. Fakti që institucionet shtetërore për 24 vite kanë bërë gjithçka për të penguar pagesën e shumës së detyruar ndaj ish-pronarëve, është pikërisht një fenomen që një përfaqësues i opozitës së djathtë duhej ta denonconte, e jo ta justifikonte, siç bën Këlliçi.

Por, gafa më e rëndë është ajo që Këlliçi nuk tregon (ose bën sikur nuk di): vetëm dy muaj pasi Sabrie Llagamit dhe trashëgimtarëve të saj iu njoh e drejta për kompensim për ata 9.500 metra katrorë mbi të cilët ndodhej ish-Parkut Automobilistik të Tregtisë, po i njëjti Komision i Kthimit dhe Kompensimit të Pronave, me vendimin nr. 668, i dha së njëjtës familje të drejtën e kthimit për 5.650 metra katrorë të tjerë, pak më larg nga parcela e parë, por këtë herë mbi tokat e zëna nga ish-Klubi Partizani. Një pjesë tjetër e atyre tokave, siç dihet, është trashëguar edhe nga dhëndri i familjes Berisha, Jamarbër M., dhe u njoh trashëgimtarëve po në atë vit, 1996.

Tani pyetja që e bën Këlliçin të dridhet është kjo: Pasi e quajti skandal faktin që familja Llagami mori kompensim për pronat e grabitura nga regjimi komunist pas 24 vitesh beteje gjyqësore, sa vjet i janë dashur asaj familjeje për të marrë mbrapsht tokat mbi të cilat ndodhej Klubi Sportiv Partizani? Vetëm 13 vjet! Në fakt akti i dorëzimit të tokave daton 16.10.2009. Dhe kjo vetëm falë faktit që procedura e kthimit të tokave të ish-Klubit Partizani është ndjekur nga trashëgimtari Jamarbër M. në emër të të gjithë ish-pronarëve (pra, përfshirë edhe Llagamin), dhe natyrisht është mbështetur nga e gjithë qeveria e Sali Berishës, e cila, sipas SPAK, ishte mobilizuar për të favorizuar interesat familjare të kryeministrit të atëhershëm.

Prandaj, nëse sot Belo Këlliçi e quan skandal që familja Llagami, duke luftuar vetëm kundër Shtetit, ka marrë kompensimin për pronat e tyre të mëparshme pas “vetëm” 24 vitesh, si e quan ai faktin që e njëjta familje, kur ka vepruar nën udhëheqjen e familjes Berisha (dhe pra, edhe pa dashje, ka përfituar nga favorizimet e qeverisë Berisha), ka marrë kthimin e pronave të tjera për vetëm 13 vjet?

Kush e di nëse, pas kësaj, SPAK nuk do të vendosë befas që në procesin për korrupsion që po zhvillohet kundër Sali dhe dhëndërit Jamarbër M. , të thërrasë si dëshmitar Belo Këlliçin, kësaj here për të mbështetur akuzën.