Shqiponja është shpendi simbol i shqiptarëve...por duket se me kalimin e kohës ajo do t'i përkasë thjesht të kaluarës.

Një shqiponjë është gjetur e ngordhur disa ditë më parë në parkun arkeologjik industrial të Sazanit duke ngritur alarmin për zhdukjen e këtij shpendi. Në Shqipëri gjenden rreth 50-100 çifte shqiponjash, ose më konkretisht 100-200 shqiponja gjithsej, një numër i cili me kalimin e kohës ka ardhur në zbritje.

Janë disa faktorë që kanë ndikuar në uljen e numrit të shqiponjave duke filluar që nga ndryshimet e skajshme të ekosistemit, tek gjuetia e tyre për shitje përkundrejt një shume të caktuar parash ose për disa të tjerë edhe thjesht për t'i ekspozuar në ambientet e lokaleve.

Situata e tyre paraqitet serioze, për këtë arsye specialistët e mjedisit japin alarmin dhe bëjnë thirrje që të merren masa, për të shmangur fundin e trishtë...që shqiponja të mbetet thjesht një simbol në flamurin tonë kombëtar.