Gjuha Shqipe, Ardian Vehbiu: Siti
i Kryeministrisë një moçal padijeje

I ngacmuar nga një shkrim i Shqiptarja.com, ku raportohet mbi pasaktësi, madje dokrra, në websitin e Këshillit të Ministrave, Ardian Vehbiu futet në këtë sit dhe bën verifikimin e materialit. Këtë e thotë në një shkrim të tijin të publikuar si zakonisht në blogun Peizazhe të Fjalës, dhe po aty i merr një e nga një pasaktësitë, dhe teksa i përgënjeshtron, nuk harron as të denoncojë padijen e atyre që e kanë shkruar atë informacion mbi gjuhën shqipe (fjala është tamam për një info të tillë).

Ja disa pohime të sitit të denoncuara e të saktësuara nga Vehbiu:

Kryeministria: Gjeografi grek, Ptholemeous, ka dëshmuar ekzistencën e shqiptarëve dhe të gjuhës shqipe që në shekullin e dytë të erës sonë.

Vehbiu: Ptolemeu nuk ka folur gjëkundi as për shqiptarë, as për gjuhën shqipe. Sikurse dihet (sikurse e di edhe bufi), shqiptarët përmenden për herë të parë në shek. XI, ndërsa gjuha shqipe edhe më vonë (në fund të shekullit XIII).

Kryeministria: Dokumenti i parë i shkruar i gjuhës bashkëkohore shqipe i përket vitit 1462.

Vehbiu: Ky dokument (Formula e Pagëzimit, së cilës ia kanë kontestuar tani vonë autenticitetin me argumente gjuhësore) është dokumenti i parë i shkruar i shqipes – jo thjesht bashkëkohore, por mbarëkohore.

Kryeministria: Alfabeti i gjuhës letrare shqipe ka 36 shkronja dhe përdoret alfabeti latin, i aprovuar nga Kongresi Kombëtar i Manastirit, më 1908.

Vehbiu: Kongresi i Manastirit miratoi dy alfabete: atë të Stambollit dhe atë të Bashkimit.

Ka dhe të tjera gjëra, por të tëra mund t’i gjeni, përveçse në sitin vetë, edhe në shkrimin e plotë të Vehbiut në linkun: http://xhaxhai.wordpress.com/2012/08/28/mocalet-e-padijes/

*Marrë nga respublica.al

(E.G./Gre.M/Shqiptarja.com)