Gjunkshi mbron Imamin:
Topi emëron gjeneralët

TIRANE- Shefi i Shtabit të Përgjithshëm, Gjeneral Xhemal Gjunkshi del në mbrojtje të ministrit Arben Imami sa i përket emërimit të Ferdinand Kreshpës si komandant i Flotës Detare në vend të Kudret Çelës.

Në një intervistë dhënë dje për "Zërin e Amerikës" Gjunkshi ka thënë se emërimi deri ne granden kolonel është kompetencë e ministrit dhe jo e Presidentit.
"Unë jam njohur me këtë; pavarësisht se jam në SHBA kam marrë informacionet edhe për këtë situatë. Dua t'ju siguroj juve dhe të gjithë ata që na ndjekin, që është ligji për të drejtën e komandimit, i cili deri në gradën kolonel i jep të drejtën ministrit të Mbrojtjes për të bërë emërimin, në detyrën e Komandantit të Forcës detare. Sot, kjo forcë nuk ka aktualisht një gjeneral. Në momentin që të ketë gjeneral, atëherë detyrimisht edhe kjo do të kalojë për të ndjekur procedurat. Ky është komenti im"- deklaroi dje gjatë intervistës në Voa, Shefi i Shtabit të Përgjithshëm gjatë intervistës.

“Kemi të bëjmë me emiërmin deri në gradën kolonel e bën ministri i Mbrojtjes këtu nuk kemi të bëjme nje një gjeneral që ministri e ka emëruar në detyrë pa e deleguar te presidenti i Republikës”- shtoi me tej.

VENDIMI I IMAMIT
Vendimi në formë urdhri nr 94, i ministrit të Mbrojtjes, Arben Imami, është firmosur më 23 janar të vitit 2012. Sipas këtij vendimi “Kapiteni i Rangut I, Ferdinand Kreshpani, deri tani me detyrë komandant i Flotiljes Detare Jugore, të Forcës Detare, lirohet nga kjo detyrë dhe emërohet me detyrë komandant i Forcës Detare. Ministri e bazon vendimin e tij në nenin 102, pika 2 e Kushtetutës, brenda drejtimeve kryesore të politikës së përgjithshme shtetërore, ku drejton nën përgjegjësinë e tij veprimtarinë që ka në kompetencë.

PS: U SHMANG PRESIDENTI TOPI 
Dy ditë më parë në mbledhjen e komisionit të Ligjeve socialsitët thanë se është shmangur komandanti i përgjithshëm të Forcave të Armatosura, Presidentin Bamir Topi. Neni 169, paragrafi 3 i Kushtetutës thotë se me propozim të ministrit të Mbrojtjes, Presidenti i Republikës, emëron dhe shkarkon komandantët e forcave tokësore, detare dhe ajrore. Në ndryshim me rastin e shkarkimit të komandantit të mëparshëm të Flotës Detare, Kudret Çelës, ku pati një dekret të Presidentit, në emërimin e Kreshpës është përdorur një tjetër standard, duke mos u marrë parasysh roli i zotit Topi.
(sg/shqiptarja.com)