Dy të arrestuarit që sfiduan për 12 orë RENEA-n në Orosh të Fushë Arrëzit mohuan të kenë lidhje me terrorizmin, por kjo nuk bindi gjykatën që i ka në masë “arrest në burg”. Avokati i Erzen Ukës pretendoi se klienti i tij ishte shok i Cumrakun, dhe se nuk kishte dijeni për armët që 34-vjeçari i kishte mbledhur sipas tij në fshat.

Erzen Uka dhe shoku i tij, Julian Cumraku, të arrestuar 2 ditë më parë pas 12 orësh nga forcat elitë RENEA në Orosh të Fushë Arrëzit, do të qëndrojnë në qeli. Të dyshuar për terrorizëm, Gjykata e Shkodrës caktoi për ta “arrest në burg”. Avokati i Erzen Ukës tha se zyrtarisht prokuroria ka vetëm akuzën e “armëmbajtjes pa leje”, të cilat sipas tij nuk janë të Ukës, me të shkuar problematike.

“Ato armë që janë të vjetra, nuk dihet nëse funksionojnë, nuk e bëjnë përgjegjës Ukën se është posedues i tyre”, tha avokati Roland Islami.

Islami hedh dyshime për mënyrën se si Erzen Uka është plagosur në këmbë, duke drejtuar gishtin drejt policisë.

“Ngrita zërin në gjykatë sa i përket plagosjes së zotit Uka. I kërkova gjykatës, i cili nëse do të ishte plagosur nga policia, kërkova që të cilësohej i paligjshëm arrestimi, ose të identifikohej se kush e plagosi”, tha avokati.

Por, përse Erzen Uka ishte në Orosh, nëse jo për përgatitjen e ndonjë plani terrorist siç dyshon policia?

“Janë dy shokë me njëri-tjetrin. Cumraku tha e kam marrë si vëllain tim në banesë. Uka tha se kishte shkuar në atë banesë, se e kishte ftuar Cumraku në banesë, dhe nuk ishte në dijeni se kishte armë. Pasi ai e di shumë mirë se ishte në ndjekje nga policia, në vëzhgim”, tha Islami.

Teksa flamuri i ISIS sipas avokatit është thjesht një shkrim në mur, për armët e gjetura brenda shtëpisë thotë se Cumraku i argumenton si të gjetura në fshat.

Erzen Uka dhe Julian Cumraku dyshohet se po përgatisnin një sulm terrorist kur u pikasën nga policia. Për 12 orë nuk pranuan t’i dorëzohen RENEA-s, ndërsa u desh ndërhyrja e familjarëve për t’i bindur. Pas dorëzimit, kontrolli në brendësi të banesës zbuloi një arsenal të plotë luftarak, përfshirë 4 armë automatike, armë të tjera dhe një flamur i organizatës terroriste ISIS. Në Orosh dhe Fushë Arrëz dyshohet se edhe një person i tretë i ka shoqëruar, i paidentifikuar akoma nga policie. Prokuroria po heton për nxitje, thirrje publike dhe propagandë për kryerjen e veprave terroriste, prodhimi i armëve luftarake, kundërshtimi i policisë dhe armëmbajtje pa leje.