Gjykata e Tiranës rrëzon sërish FSHF, 2 vendime që i anulojnë zgjedhjet Dukës! S'ka Asamble më 2 mars, shpallen nul të gjitha vendimet e organeve drejtuese

Gjykata e Tiranës ka rrëzuar serish Federatën Shqiptare të Futbollit dhe Armand Dukën për çështjen e zgjedhjeve të 2 marsit. Gjyqtari Flamur Kapllani ka pranuar kërkesën e Akademisë së Futbollit 'Albanët', duke i bërë 2 vendimet e Gjykatës për anulim të datës së zgjedhjeve dhe vendimeve të marra deri më tani nga Duka dhe organet e tjera të FSHF.

Me një vendim të datës 17 shkurt përmes vendim të gjyqtares Fida Osmani Gjykata ka pezulluar garën e 2 marsit deri në shqyrtimin e padive të Shoqatave Rajonale për manipulim të procesit, e më konkretisht të shoqatës së Durrësit, Gjirokastrës dhe Shkodrës, ndërsa edhe Fieri e Korça kanë patur kundërshti të forta, por nuk ngritën padi. Gjithashtu, Gjykata e Tiranës, janë pezulluar të gjitha vendimet e marra deri më tani në funksion të procesit zgjedhor për garën e FSHF. 

Anulimi i zgjedhjeve për president vjen pak ditë pasi gjykata e Tiranës vendosi të mos njohë zgjedhjet në shoqatën rajonale të futbollit të kryera nga federata, ndërsa më pas shpalli të ligjshme asamblenë e thirrur nga Erion Veliaj, ku kryetar u zgjodh Eduard Prodani. Nga ana tjetër FSHF thotë se nuk i njeh vendimet e gjykatës së Tiranës, duke këmbëngulur se zgjedhjet e 2 marsit për president, por edhe asambleja e shoqatës së Tiranës ku kryetar u zgjodh Krenar Alimehmeti janë të vlefshme.

Një tjetër vendim në disfavor të Armand Dukës është marrë nga Gjykata e Tiranës, e cila e ka dënuar me një gjobë prej 700 mijë lekësh. Në argumentin e tyre, togat e zeza thonë se FSHF me në krye Armand Dukën, kanë zvarritur hetimet, duke kërkuar përjashtimin e gjyqtares Fida Osmani.

Deri më tani Armand Duka ka shpërfillur vendimin e  Gjykatës e cila vendosi pezullimin e zgjedhjeve në të gjithë vendin për Federatën Shqiptare të Futbollit. Duke sfiduar hapur ligjet dhe gjykatat e vendit,  Duka ka zhvilluar dje aktivitet në kuadër të fushatës së tij për të siguruar edhe një mandat të gjashtë. Kujtojmë se në nenin 320/a, të Kodit Penal, thuhet se mosekzekutimi pa shkaqe të përligjura i vendimit të gjykatës, sikurse kërkon të bëjë Armand Duka duke mos iu bindur vendimit të gjykatës që i ndalon zgjedhjet, dënohet me gjobë deri në 3 vite burg.

Vendimi i Gjykatës:

1. Pezullimin e efekteve juridike të Vendimit datë 21.01 2022 të Komitetit Ekzekutiv të Federatës Shqiptare të Futbollit, për thirrjen e Asamblesë së Përgjithshme të Zakonshme Zgjedhore, e planifikuar për të zhvilluar punimet në datë 02.03.2022 ora 10:00, deri në përfundim të gjykimit të themelit të çështjes.

2. Pezullimin e veprimtarisë së Komisionit të Verifikimit të FSHF-së, në ushtrimin e kompetencave të tij statutore, në organizimin, mbikqyrjen dhe drejtimin e Asamblesë së Përgjithshme të FSHF-se të datës 02.03.2022, deri në marrjen e një vendimi të formës së prerë nga Gjykata në lidhje me objektin e kërkesëpadisë.

3. Kundër këtij vendimi lejohet ankim i veçantë në Gjykatën e Apelit Tiranë, brenda 5 (pesë) ditëve, duke filluar ky afat nga e nesëmja e njoftimit të vendimit të arsyetuar. 

K.T./Shqiptarja.com

TAG:
• Armand Duka
• skandali fshf
• zgjedhjet ne fshf