Gjykata Tiranë, 8 padi në ditë
për urdhëra ekzekutimi

TIRANE- Në Tiranë, mesatarisht ndaj tetë qytetarëve në dite bankat dorëzojnë padi ndaj tyre për shkak të mos shlyerjes së kredive. Referuar statistikave vjetore që ofron Gjykata e Tiranës, të tilla padi zënë gjysmën e fluksit të urdhërave të ekzekutimit. “Pranë Gjykatës së Tiranës, për vitin 2013 janë regjistruar 5 893 kërkesa me objekt lëshimin e urdhërit të ekzekutimit.

Nga verifikimet e bëra rezulton se nga ana e institucioneve bankare janë depozituar 2 235 kërkesa për lëshimin  e urdhërit të ekzekutimit për kontratat e kredise”, deklaroi Eva Avdia, zëdhënëse e Gjykatës së Tiranës. Ajo që vihet re, se pasi kanë shkelur kontratën e kredisë qytetarët humbasin zakonisht edhe në gjykatë. “Nga ana e kësaj gjykate janë përfunduar 2 133 çështje, për 1 953 prej tyre është vendosur pranimi i kërkesës së bankës”, deklaroi Avdia. Këto urdhëra ekzekutimi u dorëzohen më pas përmbaruesve privatë për kalimin e kolateralit në llogari të bankes apo për nxjerrjen e saj në ankand publik. Kohët e fundit ka patur ndryshime të Kodit Civil që lejojnë lehtësim të vënies dorë mbi kolaterlin e kredive bankare.

Shkrimi u publikua sot (04.10.2013) në gazetën Shqiptarja.com (print)

Redaksia Online
(d.d/shqiptarja.com)