Gjylameti: Kryesia e PS vendos
për fatin e Elvis Rroshit në Parti

Partia Socialiste krahas distancimit ndaj Elvis Rroshit, pritet të shqyrtojë nëse ai do të vazhdojë të jetë në Partinë Socialiste.
 
Deputetja Blerina Gjylameti deklaroi në emisionin “45 minuta” në Report TV se, do të jetë kryesia e PS që do të marrë një vendim për fatin e tij politik brenda Partisë.
 
Deputetja socialiste foli edhe për përjashtimin e Berishës me 10 ditë nga Kuvendi. Ajo tha se ish kreu demokrat, do të përjashtohet sa herë të shkelë rregulloren. 

Ta nisim nga rasti i z. Rroshi. Jeni shokuar, nëse do ta quaja kështu, edhe si parti nga kjo që ka ndodhur me Elvis Rroshin? Apo është diçka shumë e madhe kjo fjalë?
 Fjala shokim është shumë e madhe. Nga ana tjetër, më shumë se sa jemi shokuar, është më mirë të themi që ne kemi marrë një vendim, i cili vjen në vazhdën e të gjitha vendimeve që kanë marrë drejtuesit e PS-së, dhe të gjithë ata që përfaqësojnë PS-në, për t’u distancuar nga të gjithë ata që mbajnë poste publike dhe detyra publike në momentet që janë në kundërshtim apo në shkelje të hapur të ligjit. Ne distancohemi, sikundër jemi distancuar he kemi treguar që, nëse për kundërshtarët tanë kjo është një lojë politike, në rastin tonë nuk është më një lojë, por ka të bëjë me diçka konkrete dhe ne jemi në çdo hap pro atyre që respektojnë ligjin, që nuk kanë dënime, dhe që janë në funksione publike, pa asnjë njollë në biografinë e tyre (kur thonë kundërshtarët).
 
Po. Do të diskutojmë edhe për kundërshtarët. Megjithatë, rasti i Elvis Rroshit nuk është si një rrufe në qiell të pastër apo të hapur, sepse ka gati një vit e gjysmë që diskutohet për emrin e tij. Ju si parti, ishin në dijeni të këtij fakti?
 Atëherë, ka një vit e gjysmë që flitet në rastin konkret, por sikundër e përmenda edhe pak më parë, ndryshimi ndërmjet mënyrës se si drejtohet Partia Socialiste dhe mënyrës se si drejtohet Partia Demokratike janë dy gjëra shumë të veçanta dhe shumë të ndara. Për sa i përket faktit, nëse për një vit e gjysmë kemi dëgjuar vetëm baltosje, kemi dëgjuar shpifje, gjatë gjithë ditës për z. Elvis Rroshi, por edhe kundër shumë drejtuesve të tjerë të Partisë Socialiste, por kur them biografia dhe njolla prapë thjesht ai lloj mentaliteti i lidhur me të shkuarën, dhe jo me të tashmen, dhe jo me ata që janë në respektim të ligjit. Një vit e gjysmë ne kemi dëgjuar baltosje, kemi dëgjuar shpifje, por në asnjë moment nuk kemi parë që një prej drejtuesve ose përfaqësuesve të Partisë Demokratike t’i drejtojë institucioneve ligjzbatuese, sikundër është Prokuroria, sikundër janë Gjykatat, për të verifikuar të gjitha ato që flisnin. Të bësh akuza publike pa pasur asnjë fakt, janë thjesht shpifje dhe baltosje dhe nuk ka asgjë të vërtetë. Ndërkohë, në momentin e parë që, dhe në këtë rast duhet thënë që ishte vetë z. Elvis Rroshi që bëri me dije faktin e dënimit të tij dhe nuk ishte një fakt i nxjerrë nga kundërshtarët tanë politikë. Kundërshtarët tanë politikë kanë një vit e gjysmë që bëjnë vetëm shpifje e baltosje.
 
Por media ka nxjerrë sot një dëshmi penaliteti në gjuhën italiane. E ka marrë nga Prokuroria?
 Atëherë, besoj që duhet të jetë nga Prokuroria. Nuk ka të bëjë me faktin që ka dalë nga kundërshtarët tanë politikë. Nëse në rastin konkret ne do të kishim dijeni ....
 
E ka bërë Prokuroria e Përgjithshme, po thoni?
 Nuk di t’jua them. Zoti Elvis Rroshi kishte angazhuar avokatët e tij për të nxjerrë në pah të vërtetën e tij. dhe në rastin konkret, sikurse bëri me dije dëshmia e penalitetit nga Prokuroria gjermane, ku dilte që ishte i padënuar, një prej akuzave që bëhej vazhdimisht nga opozita, ishte se ai ishte i dënuar në Gjermani. Ai nxori që ishte i padënuar. Në vazhdën e atyre investigimeve për të parë dhe për të nxjerrë të vërtetën e tij, ka marrë dijeni për rastin që është gjykuar dhe dënuar në mungesë dhe pa dijeninë e tij, kur ka qenë në moshën 16-vjeçare apo minoren. Atëherë, dallimi është shumë i madh. Dhe duhet të qëndrojmë pak te dallimi. Në një vit e gjysmë, nëse do të kishin dijeni për raste këtilla, përse nuk shkuan në organet ligjzbatuese? Përse nuk shkojnë atje ku duhet të shkojë gjithkush prej nesh. E ka detyrim ligjor. Në momentin që ka dijeni, ka fakte për raste të tilla apo dhe për raste të tjera, sepse nuk është e pakët balta që ata hedhin çdo ditë, përse nuk shkohet atje? Nëse duan të nxjerrim të vërtetën, e vërteta e vetme është që duhet të shkosh dhe ta nxjerrësh atje ku janë organet që merren me këtë punë.
 
Po këtë të vërtetë a e pranoni sot, znj. Gjylameti, se doli nga ky proces, të cilin ju nuk e keni dashur shumë. Madje, vetë z. Rama e ka quajtur si një proces të pavlerë të gjithë këtë që ne e kemi quajtur si dekriminalizim, të cilin ju nuk e keni pranuar me qejf. Madje, dy ditë më parë, z. Peleshi tha se në një pjesë të madhe të tij ky ligj është antikushtetues. Por, po jep efekt apo jo?
 Jo. Nuk duhet thënë që ne nuk e kemi pasur me dëshirë. Vullnetin tonë ne e kemi treguar me votat në Parlament.
 
Sigurisht, por po them me vullnet politik...
 Është vullneti politik i kësaj maxhorance që bëri që të votohet ky ligj. Përse nuk u bë më parë? E kanë pasur maxhorancën ata që sot janë në opozitë. Përse nuk e kanë bërë më parë këtë ligj? Unë s’dua të analizoj më tepër se ç’ka thënë z. Peleshi, por dua të analizoj qëndrimin tonë politik. Ne kemi një akuzë të vazhdueshme nga Partia Demokratike, që ne kemi 19 të dënuar në Parlamentin shqiptar te Partia Socialiste, në grupin parlamentar të Partisë Socialiste. Ku janë këta 19?
 
Duhet të presim, znj. Gjylameti?
 Duhet të presim deri në fund, por unë nuk mund të mendoj kurrsesi që na ka munguar vullneti ne, sepse është vullneti i kësaj maxhorance që u kalua ai ligj në Parlament, që u miratua.
 
Sigurisht, nuk e vë në dyshim vullnetin...
 Dhe vullneti i kësaj maxhorance është edhe në thirrjen që i është bërë herë pas here opozitës për t’u ulur, për të bashkëpunuar dhe për të kaluar ligje të rëndësishme. Atëherë janë ligje të cilat janë votuar nga kjo maxhorancë. Nëse do ta kishin pasur ata vullnetin e tillë, përse nuk e bënë më parë? Ka një dallim thelbësor në mënyrën se si qeveriset, në mënyrën se si drejtohet një parti politike, ndërmjet dy kaheve, ndërmjet Partisë Socialiste dhe Partisë Demokratike. Nëse ne kemi bërë distancim edhe të mëparshëm nga të gjithë ata persona apo përfaqësues të Partisë Socialiste që kanë pasur probleme me ligjin në të shkuarën, pavarësisht faktit që nuk ishte miratuar ende Ligji për Dekriminalizimin, ne patëm një lloj distancimi. Jo një lloj, por kemi pasur distancim të menjëhershëm që të gjithë këta të shkojnë dhe të provojnë pafajësinë e tyre para organeve ligjzbatuese. Atëherë, në rastin konkret, pse nuk ka dalë askush nga Partia Demokratike të flasë për të gjithë ata deputetë, kryetarë bashkish apo përfaqësues të lartë, të cilët edhe në formularët që kanë vetëplotësuar kanë dalë me probleme në të shkuarën me ligjin. S’kemi parë asnjë. Ne kemi një kryetar të Partisë Demokratike, i cili ka shmangur të gjithë procesin ku ai akuzohej për shpërdorim dhe për korrupsion, dhe korrupsion me 220 milionë euro, vetëm duke përdorur një artific ligjor, sikundër është ai i raportit mjekësor. Dhe nuk besoj se z. Basha mund të ketë qenë i sëmurë për një vit e ca.
 
Nuk e vë në dyshim, por pak çaste më parë thatë se përse Partia Demokratike këto akuza nuk i ka çuar në organet e drejtësisë. Dhe të njëjtën pyetje po jua bëj edhe unë. Përse këto akuza për deputetët e PD-së dhe për eksponentët që ju i cilësoni me një të kaluar të njollosur, nuk i çoni në Prokurori? Se rezulton që i vetmi që i është nënshtruar, le të themi, kontrollit më imtësisht tani është Elvis Rroshi. Ne nuk e dimë që Prokuroria ka nisur për këta të tjerët, nga njëra anë apo nga ana tjetër, verifikimin, sepse jemi në fazën e vetëdeklarimit.
 Atëherë, thashë që rastin e kreut të Partisë Demokratike ne e kemi çuar në Prokurori. Ka pasur akuza të vazhdueshme. Kemi qenë pranë organeve ligjzbatuese për të arritur atë çfarë janë të gjitha, ose më saktë, akuzat politike që janë bazuar në fakte. Atëherë, një gjë është të flasësh politikisht sikundër justifikohet një pjesë e mirë e përfaqësuesve të Partisë Demokratike, kur, sa herë që shkojnë pranë dyerve të gjykatave për të folur mbi baltosjen që bëjnë çdo ditë ndaj përfaqësuesve të Partisë Socialiste, atëherë cili është justifikimi i tyre? Thonë, ne flasim politikisht. Në rastin konkret, Partia Socialiste apo asnjë përfaqësues i saj nuk del të flasë politikisht, por del me fakte. Në momentin që ne do të kemi fakte për të gjithë zotërinjtë në fjalë, ne do t’i drejtohemi Prokurorisë dhe organeve përkatëse.
 
Zonja Gjylameti, unë e them hapur se nuk kam ndonjë problem apo kompleks edhe në këtë drejtim të ruajtjes së paanshmërisë, sepse përvoja ka treguar që është e vërtetë që ju distancoheni menjëherë, ndryshe nga pala tjetër, por pyetja e madhe që bën publiku sot është që përse kjo Partia Socialiste ka kaq shumë nga këta individë që detyrohet të distancohet herë pas here? A mbani edhe juve përgjegjësi për këtë rritje të numrit të këtyre individëve, nga të cilët është e vërtetë që jeni distancuar, por është një rast që tregon se jeni njollosur herë pas here me individë të kësaj natyre, apo jo?
 Unë besoj se nuk mund të themi që jemi njollosur. Atëherë, ka një dëshmi penaliteti, e cila dorëzohet në momentin që dikush dëshiron të kandidojë nën siglën e një partie politike.
 
Por dëshminë që të dyja palët e kanë të pastër, zonja Gjylameti...
 Atëherë, në momentin që ne kemi të padënuar ose më saktë, nuk kemi dijeni mbi të shkuarën e tyre, por dëshmia e penalitetit tregon që janë të pastër, pra nuk tregon të dënuar, atëherë ne kemi marrë vendime për t’i kandiduar. Nëse do të duhej që ne të investigonim herë pas here për të kuptuar pastërtinë e këtyre figurave, nuk e di, ndoshta po. Por, për sa i përket anës ligjore, Partia Socialiste ka qenë në zbatim të të gjitha ligjeve në fuqi.
 
Këtë gjë e bën Ligji i Dekriminalizimit, besoj...
Për herë të parë dhe prandaj ne treguam vullnetin e duhur dhe e votuam këtë ligj për t’i shkuar deri në fund pastërtisë së figurave publike dhe të drejtuesve politikë shqiptarë.
 
Themi sot që është një ligj i domosdoshëm dhe për t’u marrë seriozisht...
Atëherë, këtë ligj ne e kemi marrë seriozisht që në momentet e para kur jemi ulur në tavolinë me opozitën për të arritur që të nxjerrim nga ky ligj atë çfarë duhet dhe çfarë presim të gjithë. Në Shqipëri ne duhet të kemi një administratë të pastër, një administratë pa persona të inkriminuar, por mbi të gjitha një administratë e cila drejtohet nga njerëz profesionistë dhe pa probleme në të shkuarën. Ky ligj është shumë i nevojshëm sikundër edhe shumë ligje të tjera. Por, nuk do të doja kurrsesi të thosha që ky është një ligj që është kërkuar nga opozita dhe neve thjesht vetëm i kemi shkuar pas duke e miratuar atë. Atëherë ka pasur shumë ligje të rëndësishme ose ka pasur shumë propozime nga Partia Socialiste kur ne kemi qenë në opozitë. Asnjëherë nuk janë mirëpritur nga pozita e dikurshme apo opozita e sotshme. Në dallim nga Partia Demokratike, ne kemi një lloj filozofie komplet ndryshe. Ne kemi ardhur për të ndërtuar shtetin e së drejtës. Nuk kemi ardhur për të bërë atë çfarë është bërë në 22 vite në këtë vend, ku çdo forcë politike vjen, jep disa, të themi, kontribute, por ndërkohë kanë funksionuar çifligjet e tyre, aspak në interes të popullit.
 
Megjithatë, këto gabime që ju i keni bërë qoftë edhe pa vetëdije, le të themi, për shkak të mungesës së informacionit, ç’do të thotë nesër? Do të jeni më të kujdesshëm nesër me përzgjedhjen e këtyre individëve, zonja Gjylameti?
 Sikundër vendimit të sotshëm, të distancimit nga zoti Rroshi, ashtu do të jetë edhe në të ardhmen, do të kemi një distancim të menjëhershëm nga çdo person që mban përgjegjësi personale, sepse kurrsesi nuk mund të themi që një parti politike mban përgjegjësi për deklarimet apo për vetëdeklarimet e individit. Çfarëdo që unë kam deklaruar në formularin tim, është një përgjegjësi personale e imja, nuk është një përgjegjësi e partisë.
 
Po, sigurisht. Megjithatë, cili do të jetë fati i z. Rroshi në raport me Partinë Socialiste. Ai është i përjashtuar që sot nga Partia Socialiste?
 Nuk ishte një vendim përjashtimi. Ne kemi marrë një lloj vendimi që z. Rroshi duhet të provojë pafajësinë e tij në organet ligjzbatuese. Pafajësia e tij duhet të provohet pranë gjykatave.
 
Nuk thotë njeri që është i fajshëm. Ai e ka kryer atë dënim. Në raport me ligjin është i fajshëm, në raport me jetën sot ai nuk është i fajshëm. Çfarë do të ndodhë me të?
 Atëherë, normalisht ai organ i cili është kryesia e Partisë Socialiste, në momentet që mblidhet kryesia e Partisë Socialiste dhe merr vendime, do t’jua bëjmë me dije.
 
Pra do të ketë një mbledhje të kryesisë së partisë për rastin e tij, sepse vërtet ju distancoheni nga ai si kryetar bashkie, por cili do të jetë qëndrimi në raport me jetën e tij politike partiake?
 Do ta kemi në vazhdimësi.
 
Ok. Doja që të flisnim edhe pak për dekriminalizimin. A ka individë të tjerë që mund të rezultojnë si z. Rroshi në Partisë Socialiste, qoftë në pushtetin qendror apo edhe në atë vendor?
 Në dijeninë time dhe sipas dëshmive të penalitetit që kanë dorëzuar të gjithë kryetarët e bashkive apo edhe drejtues në administratën publike, nuk kemi. Por kjo është për t’u parë.
 
Pra nuk përjashtohet. Ju nuk keni informacion por nuk përjashtohet?
 Atëherë, në dijeninë time, jo. Më pas, është për t’u parë. Nuk dua që ta shikojmë z. Rroshi si një fenomen. Janë raste dhe nuk do të doja kurrsesi sepse dhe nëpërmjet nesh, ne çojmë edhe mesazhe në publik. Nuk mund ta shikojmë rastin Rroshi ose raste të tjera që mund të kemi, si fenomene, në shoqërinë shqiptare apo në politikën shqiptare. Kurrsesi Parlamenti shqiptar, i cili përbëhet nga 140 deputete dhe deputetë, nuk mund të shikohet si një Parlament i inkriminuar apo edhe 61 kryetarët e bashkive nuk mund të shikohen si 61 persona të inkriminuar. Janë raste të veçanta, janë raste sporadike, nga të cilat ne distancohemi, dhe nuk dua kurrsesi që të shikohen si fenomene, sepse është baltosur mjaftueshëm politika shqiptare.
 
Megjithatë ju besoj se e keni dëgjuar propozimin e një kolegut tuaj në Parlament, z. Astrit Patozi, i cili flet për shkak të kësaj situate të krijuar. Ai ka hedhur idenë për të mbajtur zgjedhjet lokale në të gjitha këto 61 bashki, edhe pse ai është shprehur se ky nuk është fenomen në të gjitha bashkitë, megjithatë do të ishte një katarsis për politikën. Si e gjykoni këtë propozim? 
Më duket diçka totalisht sureale, më shumë se sa reale, që të flasim për zgjedhje të parakohshme ose të rimbajmë zgjedhjet në 61 bashkitë, është një situatë tamam sureale. Nuk mund të gjej fjalë tjetër për të thënë. Është sureale. Nuk mund të diskutojmë që buxhetit të shtetit apo çdo taksapaguesi shqiptar, ne t’i themi sot që do të mbajmë zgjedhje për shkak të një individi që doli me probleme, ose për shkak të propozimit të një deputeti, të mbajmë zgjedhje të cilat kushtojnë dhe që i kushtojnë çdo taksapaguesi shqiptar. Mendoj që më shumë se sa të diskutojmë se duhet të rimbajmë zgjedhje, është më mirë që të shikojmë pastërtinë e figurave, të distancohemi nga këto raste dhe t’i dërgojmë pranë organeve të Prokurorisë apo të gjykatave të gjitha ata që mund të kenë këto probleme dhe, ndërkohë, në të ardhmen të jemi edhe më të kujdesshëm për çfarë ne propozojmë si forca politike. Por nuk besoj kurrsesi se duhet në Shqipëri të bëjmë zgjedhje të tilla për të arritur që të rëndojmë më keq buxhetin e shtetit.
 
Ndërkohë kemi një situatë reale, të paktën për këto dy bashki që do të kenë zgjedhje: në bashkinë e Peshkopisë dhe në atë të Kavajës. Besoj se situata e Kavajës ju gjen pak të papërgatitur në këtë emision sot, por për Peshkopinë e keni një emër, znj. Gjylameti, apo nuk është diskutuar ende në kryesi?
 Jo, nuk kemi ende një emër. Jemi duke diskutuar por nuk ka ende një emër konkret. Sapo ta kemi, do t’jua bëjmë me dije.
 
Patjetër, sepse emrat janë publikë, megjithatë është një fenomen që po ndodh në Partinë Socialiste, që po mblidheni shpesh si kryesi, ndryshe nga kryesia e kaluar që nuk mblidhej asnjëherë, kësaj radhe pothuajse çdo javë mblidheni në kryesi. Çfarë diskutoni, znj. Gjylameti?
 Një forcë që qeveris vendin dhe qeveris me reforma shumë të rëndësishme, si mund të mos kishte reforma të rëndësishme ose reformim të forcës së saj politike, të mënyrës së saj të organizimit. Dhe duke qenë se ne jemi një forcë e cila jo vetëm pranon gabimet por shikon edhe se si mund t’i ndreqë ato, kjo pjesa e mbledhjes së kryesisë ka qenë edhe në vazhdën e një procesi të reformimit.
 
Edhe të kritikave që keni pasur.
 Jo vetëm të kritikave. Nuk vjen si reflektim vetëm i kritikave, por vjen gjithashtu edhe të një momenti të rëndësishëm, në të cilin është Partia Socialiste, një moment i cili ka të bëjë me dyfishimin e anëtarësisë së saj, me ndryshimin e formatit ose me riorganizimin, rivitalizimin e forcës në të cilën ne mbështetemi që janë anëtarët e Partisë Socialiste, dhe në organizatat bazë socialiste që është njësia më e vogël organizative në Partinë Socialiste. Duke qenë se ne kemi këtë kuadrin ose në kuadër të 25-vjetorit të Partisë Socialiste, kemi dyfishimin e anëtarësisë, që ka të bëjë me një sërë aktivitetesh që janë ndërmarrë në të gjithë Shqipërinë edhe me ristrukturimin e të gjitha organizatave, duke arritur në zgjedhjen e kryetarëve të organizatave. Tashmë jemi në një moment shumë të rëndësishëm sikundër është ai i zgjedhjeve të kryetarëve të Partisë Socialiste në 61 bashki, meqenëse kemi marrë një formë të përshtatjes sipas reformës administrative territoriale. Në mënyrë të tillë, mbledhjet e kryesisë kanë qenë tërësisht organizative, në funksion të këtyre objektivave. Plus që mbledhjet e shpeshta të kohëve të fundit, sikundër e thashë kanë qenë për zgjedhjet e 61 kryetarëve dhe për 25-vjetorin e partisë, të aktiviteteve që do të vijojnë.
 
Për ta vijuar dhe për ta lidhur bisedën me dekriminalizimin, pavarësisht se figurat e reja të Partisë Socialiste në 61 bashkitë nuk janë figura në administratën publike në qendër apo në atë lokale, gjithsesi publiku ka interes të dijë për pastërtinë e tyre. A janë të pastra këto figura?
 Atëherë, është e përfshirë në Statutin e Partisë Socialiste që, të gjithë ata që janë kandidatë për kryetarë të Partisë Socialiste në 61 degët e saj, pra në 61 bashkitë, të jenë figura të pastra.
 
Media ka folur për një rast në Himarë, për një individ në Himarë si i dënuar në të kaluarën. Ju keni informacion?
Në dijeninë time, jo. E kam ndjekur nga mediat, por në dijeninë time jo.
 
Vetë koordinatori i qarkut të Vlorës, zoti Kokëdhima e ka pranuar dënimin, por ka thënë që ai e ka shlyer këtë në jetën e tij. Nuk përbën problem për Statutin e Partisë Socialiste?
 Nuk e di, nuk kam dijeni. Në momentin që do të kem dijeni, do të kem edhe një opinion timin.
 
Por për sa i përket rastit kur një kandidat i vetëm nuk ka arritur të marrë votat, si ju duket? Ka pasur disa bashki ku një kandidat që ju keni propozuar ka marrë më pak vota pro se sa kundër.
Nuk besoj. Ku ka ndodhur?

Janë disa bashki...
Atëherë, ka pasur një bashki ku kanë qenë në balotazh. Ka pasur të tjerë që kanë pasur një përqindje të po-së dhe s’i funksionon. Një kandidat për kryetar të Partisë Socialiste në bashki, kur është i vetëm, duhet të marrë votëbesimin, pra, duhet të marrë 51 për qind të atyre që përbëjnë asamblenë e zgjeruar të Partisë Socialiste në bashki, që përbëhet nga kryetarët e organizatave të Partisë Socialiste, më pas kalojmë me delegatët e kongresit, anëtarët e asamblesë kombëtare, deputetët, kryetarët e bashkive në momentin që janë anëtarë të Partisë Socialiste. Atëherë, 51-përqindëshi, në dijeninë time, është marrë nga kandidatët që kanë qenë të propozuar. Nuk kemi mbaruar ende dhe një rezyme të asaj çfarë ka ndodhur në zgjedhjet për kryetarë të partive në 61 degët, do ta kemi besoj nga java tjetër. Kur të mbarojmë edhe me 2 qarqet e tjera, Tiranën dhe Kukësin, qarku Kukës komplet dhe pastaj bashkia Tiranë.
 
Bashkia Tiranë, ku është edhe interesi më i madh, kë ka si kandidat? 
Jemi ende në procesin e mbledhjes së kandidaturave në këshillat socialistë të njësive administrative.
 
Pse kaq me vonesë apo ka interes të madh edhe nga vetë pretendentët?
 Atëherë, jo vetëm, por duke qenë se Bashkia Tiranë përbëhet nga 24 njësi administrative, imagjinoni 24 mbledhje të këshillave socialistë të njësive administrative, së pari duke u zgjedhur ata që janë kryetarët e këshillave socialistë. Më pas vjen momenti i dytë që ka të bëjë me kryetarin e PS-së në Bashkinë Tiranë. Meqë është një nga baskitë më të rëndësishme edhe interesi edhe mënyra e zgjedhjes duhet të jetë pak më e shtuar.
 
Megjithatë, prandaj po këmbëngul. Duke qenë se dy emrat që kanë shumë interes për Tiranën si Veliaj dhe Tahiri janë përjashtuar nga mundësia për t’u zgjedhur si kryetarë të PS-së për Bashkinë e Tiranës, a mund të na thoni ndonjë emër tjetër që ka shfaqur dëshirën për të qenë kandidat, znj. Gjylameti?
Jo, ende.
 
Po pse kaq hermetik ky proces?
Jo, nuk është hermetik. Po mblidhen propozimet për kandidaturat në çdo njësi. Janë emra të cilët nuk janë të njohur për publikun. Më saktë, të themi, nuk janë figura qendrore politike në disa njësi ku janë bërë këto mbledhje. Në njësitë e tjera po vazhdon ende procesi. Ndërkohë që ka një element, sikundër ju e thatë, që personat që u përmendën, Kryetari i Bashkisë dhe Ministri i Brendshëm, ka një nen të Statutit, i cili nuk lejon kandidimin e tyre, por kjo nuk do të thotë që nuk do të dalë një figurë tjetër që nuk ka probleme me përputhshmërinë e mandatit.
 
Që mund të jetë politikan i një niveli të lartë, apo do të kemi emra të panjohur kësaj radhe?
Duhet ta shikojmë këtë në vazhdimësi. Problemi është vetëm përputhshmëria. 

Redaksia Online
l.q/Shqiptarja.com