POP 5

Lajmet më të lexuara të 5 minutave të fundit

Godina 165-vjeçare, monument kulture, e ish- rezidencës së ishpeshkëvisë drejt degradimit

E njohur si ish- rezidenca e ishpeshkëvisë në fshatin Delbnisht, të rrethit të Kurbinit godina 165-vjeçare po degradon çdo ditë edhe më shumë. Për kamerën e “ReportTV” Paulin Zefi, specialist i Monumenteve të Kulturës ka dhënë alarmin se ndërtuar në vitin 1851 së bashku me rindërtimin e kishës së Shën Teodorit, e cila ishte shkatërruar nga Turqit që në vitin 1478 po shkatërrohen. Rreth pesë vite më herët, ky objekt që ka shërbyer për të drejtuar e kontrolluar 18 famulli, duke përfshirë Durrësin, Krujën, Tiranën, Kurbinin, Matin dhe një pjesë të Mirditës u shpall monument kulture i kategorisë së parë.

“Objekti i ipeshkivës së Durrësit është një ndër objektet më të mëdha, që ndodhet në malësi të Kurbinit, ka qenë një kuvend edhe shkollë ku mësohej, përveçse ka qenë qendra e ipeshkivëve të Durrësit pasi u transferuan në vitin 1501. Ata u detyruan që të shkojnë në këtë godinë në Kurbin, pasi ishte larg bregdetit edhe larg qendrave kryesore”, shprehet Paulin Zefi, specialist i monumenteve të Kulturës.


Ndërtesa ka vlera të mëdha arkitektonike, kulturore dhe historike. Në të kanë shërbyer figura të ndritura të katolicizmit. Në vitin 1914 këtë rezidencë e kanë djegur dhe shkatërruar ithtarët e Haxhi Qamilit. Pas këtij shkatërrimi rezidenca u restaurua në vitet ‘20, por pasi humbi edhe katin e tretë.

 “Objekti formën që ka sot e ka marrë në vitet 20 të shekullit 20 edhe ka një pamje madhështore, madje prej pesë vitesh është shpallur monument kulture i kategorisë së parë. Kemi edhe një kishë ngjitur me objektin, e shekullit XV-XVII. Objekti ka nevojë në tërësi. Është dëmtuar altari i kishës. Me dijeninë time ka disa shoqata, por nuk janë qasur nga drejtoria rajonale e Shkodrës. Këtu nuk është problem financa, por duhet vullneti i mirë i IMK-së dhe MK-së”, thotë Zefi.

Gjatë komunizmit shërbeu si shkollë, deri në vitin 1991, kur kjo godinë iu kthye kishës. Ndërsa, edhe përse duhet të vihet dorë në të nga institucionet përkatëse objekti i shpallur monument kulture për vlerat që mbart është në gjendje të mjerueshme.

v.d./b.ha./Shqiptarja.com
Komento