GOLAT/ Interi tre gola për kreun, Napoli fiton edhe pa Osimhen! Lazio mposht Sassuolon

Për javën e nëntë në Serie A, Lazio fitoi 0-2 kundër Sassuolos në "Mapei Stadium". Ky pritej të ishte një derbi mes shqiptarësh, teksa as Bajrami dhe as Hysaj nuk morën minuta në këtë duel. Nedimi i Sassuolos nuk ishte as i grumbulluar, ndërsa Elseidi i Lazio qëndroi në stol. Ndeshja u zhbllokua pas 28 minutash lojë me golin e Felipe Anderson. Në të 35 minutë ishte Luis Alberto që shënoi golin e dytë. Me këtë fitore, Lazio shkon në kuotën e 13 pikëve për vendin e shtatë, ndërsa Sassuolo me 10 pikë mban vendin e 13-të.

Në fundin e ndeshjes Torino 0-3 Inter, lojtari i Torinos, kroati Nikola Vlashiç është shtrirë në tokë pa ndjenja. Një moment paniku për të gjithë pasi iu afruan futbollistët e të dy ekipeve të cilët dukeshin të terrorizuar nga ajo që panë, ndërsa ishin stafet mjekësore të dy ekipeve që shpejtoi ta ndihmonte.

Për fat të mirë pas tre minutash lojtari u përmend dhe u largua me këmbët e tij nga terreni i lojës, sigurisht i shoqëruar nga stafi mjekësor. Sipas mediave italiane, ai do të dërgohet menjëherë në klinikë për kontrolle më të hollësishme pasi humbja e ndjenjave erdhi si pasojë e një përplasje në fushë.

Në stadiumin "Olimpik" në Torino, vendasit u mundën 0-3 nga Interi. Ziklatërit e Inzaghit tanimë janë në krye të Serie A me 22 pikë, kjo pasi Milan ka një ndeshje për të zhvilluar. Pjesa e parë u mbyll pa gola, ndërsa në të 59 minutë u zhbllokua gjithçka me golin e Thuram, kjo pas asistit të Dumfries. Në të 67 minutë shënoi edhe Lautaro me kokë. Në fundin e ndeshjes shënoi edhe Calhanoglu me penallti. Me këtë sukses Interi merr kreun për momentin, duke qënë me 22 pikë. Torino me nëntë pikë mban vendin e 14-të.

Në stadiumin "Marc'Antonio Bentegodi", Verona vendase humbi 1-3 me Napolin për javën e nëntë. Dueli nisi më herët jashtë fushe, me tifozët miq që shkaktuan kaos dhe u përplasën me policinë para ndeshjes. Sa i takon fushës së gjelbërt, gjithçka nisi në minutën e 27-të me Politanon, që kaloi djemtë e Garcias në epërsi. Më pas Kvaratskhelia në minutën e 43 dërgoi ndeshjen në 0-2. Sërish gjeorgjiani në minutën e 55-të shënoi për 0-3, teksa goli i Lazovic për vendasit në të 60 shërbeu sa për statistika. Tanimë me këtë sukses Napoli shkon në kuotën e 17 pikëve për vendin e pestë, ndërsa Verona me tetë pikë mban vendin e 16-të.