Graçanicë- KQZ: 7,79 % e zgjedhësve deri në orën 11:30

/ATSH/.- Në zgjedhjet për kryetar të komunës së Graçanicës deri në orën 11:30 kanë votuar 1 mijë e 576 votues ose 7.79 për qind e zgjedhësve.
Sipas KosovaPress, kështu ka bërë të ditur kryetarja e KQZ-së Valdete Daka në konferencën për media lidhur me zgjedhjet e jashtëzakonshme që po mbahen sot për kryetar të Graçanicës, duke shtuar se procesi i votimit në këtë komunë është duke u zhvilluar normalisht.

Sipas saj, në krahasim nga zgjedhjet lokale të vitit 2013, deri në këtë orë, numri i votuesve është më i ulët. "Në zgjedhjet e kaluara lokale të vitit 2013 , përafërsisht në të njëjtën kohë kanë votuar 2 mijë 190 votues apo 11.41 për qind e tyre. Deri më tani procesi i votimit është duke shkuar në rregull", tha Daka.

Ndërsa sa i përket asaj se me çfarë dokumentesh po votohet, anëtari i KQZ-së në Graçanicë nga Lista Serbe Nenad Rikalo, në një deklaratë të dhënë më herët thotë se, sikurse edhe në zgjedhjet e kaluara parlamentare votuesit mund të votojnë me dokumente të vlefshme që janë lëshuar nga Ministria e Punëve të Brendshme e Kosovës dhe ajo e Serbisë.
Por, Daka bëri të ditur për publikun se të gjitha deklaratat e anëtarëve të KQZ-së që jepen në emër të tyre, janë tërësisht personale.

"Ndoshta do të kishte qenë mirë për informim të opinionit publik se deklaratat e anëtarëve të KQZ-së të cilat jepen në emër të tyre personal, janë deklarata të tyre personale", tha ajo.

Zgjedhjet e jashtëzakonshme për kryetar të Graçanicës po mbahen për shkak se kryetari i deritanishëm Branimir Stajoneviq është emëruar zëvendëskryeministër në Qeverinë e Isa Mustafës.

Për të parin e Gracanicës garojnë Vlladeta Kostiq nga Lista Serbe, Nenad Rashiq nga Partia Demokratike Serbe, Dragisha Miriq nga Partia e Re e Kosovës dhe Shaip Berisha nga LDK-ja.
 
 

TAG:
• kqz