Hajdari ironizon PD: Mua s'më lanë gjë pa më sharë, sot u ra goja për Bushatin si zë ndryshe në PS

TIRANË-Kryetarja e grupit parlamentar demokrat, Rudina Hajdari ka ironizuar të gjithë zërat nga PD-ja që kanë vlerësuar Ditmir Bushatin, si një mendim ndryshe nga PS-ja. Ajo rikthehet pas në kohën kur ishte kundër vendimit të opozitës për djegien e mandateve, vendim për të cilën shprehet, se përfaqësues nga selia blu iu kundërvunë, madje edhe deklaruan se është blerë nga kryeministri Edi Rama.

Madje me ironi, në vazhdën e atyre akuzave nga selia blu, ajo ngre pyetjen nëse kjo mbrojtje që po i bëhet Bushatit dhe akuzat e këtij të fundit kundër Ramës, janë tregues ose jo se ish-ministri i jashtëm është blerë nga PD-ja.

"Ata që nuk lanë gjë pa më sharë e akuzuar mua, kur vendosa të mos djeg mandatin, tani ju ra goja duke thënë se sa e vlersojnë Bushatin, si një zë ndryshe brenda Partisë Socialiste. Vras mendjen mos e ka blerë gjë Partia Demokratike", shkruan Hajdari.

Ish-ministri i Jashtëm Ditmir Bushati ka rritur protagonizmin e tij politik javët e fundit, duke artikuluar kritika në adresë të drejtuesve të Partisë Socialiste dhe sidomos kryeministrit Edi Rama. Dalja në skenë e Bushatit në rolin e oponentit të qeverisë përkon me humbjen e privilegjeve, fillimisht si Ministër i Jashtëm dhe më pas edhe si koordinator politik në kryeqendrën e Veriut, Shkodër, pas rezultatit dramatik në zgjedhjet e fundit.

Mbrëmjen e së mërkurës, Bushati ishte protagonist i debateve të forta në mbledhjen e Kryesisë së PS, teksa kërkoi të mbahej përgjegjësi për Valdrin Pjetrin dhe Tom Doshin, ndonëse muaj më parë, vetë i kishte vlerësuar maksimalisht.

Postimi i plotë i Hajdarit

B.K./Shqiptarja.com

TAG:
• edi rama
• PS
• ditmir bushati
• PD
• Rudina Hajdari