Halimi: Arrestuan Hoxhën në
mes të natës, e Zyhdiu bën plazh

TIRANE - Partia Demokratike e ka quajtur urdhër politik të kryeminsitrit Rama arrestimin e kreut të Inspektoriatit Urbanistik Vendor në Bashkinë e Tiranës, Florenc Hoxha. Në një konferencë për mediat nga selia e partisë Demokratike, deputeti Eduard Halimi hodhi akuza se policia, atë që ai e quan bandë të urdhëruar nga Rama, nuk ka arrestuar kreun e INUK Zyhhdi Dajti edhe pse ndaj tij ka dalë masa e arrestit.
 
"Partia Demokratike dënon me forcë zbatimin e dy standarteve nga Kryeministri Edi Rama, në të njëjtën ditë, për të njëjtën akuzë të Prokurorisë, për vendime gjyësore të njëjta të dala nga e njëjta gjykatë. Nga njëra anë, policia e shtetit ndalon shefin e inspektoriatit ndërtimor të Bashkisë së Tiranës, dhe nga ana tjetër, Edi Rama urdhëron mbrojtje politike për Zyhdi Dajtin, shefin e tij të Inspektoriatit Ndërtimor Kombëtar, duke penguar zbatimin e vendimit të gjykatës.

Organi i akuzës ka nxjerrë dje dy urdhëra ndalimi, gjykata ka miratuar urdhërat për të dy zyrtarët. Por zyrtari i Bashkisë, arrestohet në vend, në mes të natës nga policia, ndërsa zyrtari i qeverisë, sejmeni i Ramës është i privilegjuar dhe bën plazh në Vlorë. Këtu ka përfunduar Policia e Shtetit, në një bandë private që nuk udhëhiqet nga ligji, por nga urdhërat politikë të Edi Ramës.

Ky është një skandal i përmasave të mëdha, që vërteton edhe një herë se në Shqipëri, barazia para ligjit, shteti ligjor dhe sundimi i ligjit është zëvendësuar me sundimin politik të Edi Ramës. Rasti i djeshëm, vërteton edhe një herë se në Shqipëri, drejtësinë nuk e bën drejtësia, por e bën Kryeministri, nuk qeveris ligji por qeveris një kastë oligarkësh, që kanë imunitet, që po e kthejnë vendin në një çiflig personal, ku mund të shkelin ligjin e të shpërdorojnë detyrën, pa frikën e drejtësisë, pasi i kanë shpatullat e ngrohta nga mbrojtja politike e Kryeministrit të vendit", tha Halimi.

Redaksia Online
(Gre.M/Shqiptarja.com)

TAG:
• Florenc Hoxha