Hapja e listave dhe koalicionet/ Këshilli Politik mblidhet nesër në 12:00, opozita shkon pa draft

Këshilli Politik do të mblidhet nesër në orën 12:00. Takimi ishte parashikuar në orën 10:00, por ishte opozita jashtëparlamentare që kërkoi shtyrje e orarit për në 12:00 duke i dërguar letër Damian Gjiknurit, ndërsa ky propozim u pranua nga ky i fundit.

"Në mbledhjen e fundit të Këshillit politik nuk pati asnjë dakordesi për të zhvilluar mbledhje ditën e premte. Ju gjithashtu refuzuat kërkesën tonë për mbledhje të Këshillit Politik ditën e mërkurë. Kjo logjike e funksionimit të njëanshëm është krejt e kundërt me mënyrën e ndërtimit dhe funksionimit të Këshillit Politik, ku qoftë ditët e mbledhjeve ashtu edhe rendi i ditës janë dakordësuar konsensualisht me parë. Megjithatë duke e konsideruar këtë si një veprim të gabuar tuajin por që nuk do përsëritet më, konfirmojmë pjesëmarrjen tonë dhe propozojmë që mbledhja të zhvillohet në orën 12:00", shkruhet në letrën që dy përfaqësuesit e opozitës jashtëparlamentare, Oerd Bylykbashi dhe Petrit Vasili, i dwrguan Damian Gjiknurit.

Nga ana e tij Gjiknuri i ka kthyer përgjigje pozitive se konfirmon pjesëmarrjen e tij në orën 12:00 për ditën e premte, 17 shtator. "Mirëmbrëma. Ju njoftoj se me kërkesën e opozitës jashtëparlamentare, mbledhja e Këshillit Politik është spostuar për në orën 12:00. Pra, nesër në orën 12:00 në të njëjtin vend. Thnx", shkruan Gjiknuri.

Më herët mazhoranca refuzoi ftesën e Partisë Demokratike që Këshilli të mblidhet me urgjencë të mërkurën, por palët ranë dakord që të mblidhen nesër për të vijuar diskutimet për listat e hapura dhe koalicionet. Opozita kërkon lista të hapura 100 %, ndërsa për mazhorancën kjo do të bëhet vetëm nëse garantohet kuota gjinore. Në lidhje me koalicionet, opozita jashtëparlamentare kërkon që të pyetet OSBE-ODHIR, ndërsa PS kërkoi propozime të tjera nga PD në të kundërtën do vijojë punën dhe pa miratimin e saj. Partia Socialiste kërkon që opozita e bashkuar të sjellë disa propozime duke vendosur afat deri më 30 shtator.

Në takimin e nesërme opozita jashtëparlamentare do të shkojë në Këshillin Politik, pa propozimet që iu kërkuan, pasi sipas saj drafti me propozimet duhet të vijë nga shumica, pasi ajo me fuqinë e kartonit solli ndryshimet kushtetuese.

TAG:
• oerd bylykbashi
• damian gjiknuri
• keshilli politik