Helmimi nga uji i pijshëm në Krujë, mbi 370 qytetarë në urgjencë, mes tyre 70 fëmijë! Del analiza e Ujësjellësit: U konstatua prezencë e amoniakut mbi normë! Mos pini ujin e mbetur në depozita

Siç shihet edhe nga fotot Bashkia e Krujës pas shumë orësh ka shpërndarë ujë me bote për qytetarët të cilët për Report Tv pohuan se gjatë ditëve të fundit e kanë blerë ujin në mënyrë që të mos helmohen si shumë qytetarë të tjerë.

Në një reagim zyrtar Ujësjellësi i Krujës, thotë se shkak paraprak për helmimin e banorëve, është kontaminimi i ujit të pijshëm si pasojë e reshjeve të dendura të shiut të shtunën dhe të dielën, veçanërisht në vendburimin e Malësisë së Krujës ku është konstatuar prezencë e amoniakut mbi normë. 

Në reagim thuhet që në burimet në Shkretë dhe Livadhe dhe depozitat e qytetit, parametrat fiziko-kimike kanë rezultuar brenda normave. 

“Gjithsesi, jemi në pritje edhe të analizave më të detajuara mikro – biologjike nga ISHP, të cilat do të japin të dhëna më të detajuara të normave të komponentëve të ujit dhe do të shërbejnë për çertifikimin e furnizimit në vijim të popullatës me ujë të pijshëm”, thotë Ujësjellësi i Krujës që thekson se ka nisur dezinfektimi i depove të qytetit me anë te proçesit të klorinimit.

Në mënyrë që të shmangen raste të tjera helmimi, Ujësjellësi i kërkon qytetarëve të zbrazin depozitat.

‘Në vijim të situatës së ndodhur në qytetin e Krujës, ku gjatë ditës së djeshme, e Hënë datë 25/10/2021, janë paraqitur për ndihmë mjekësore një numër i konsiderueshëm banorësh pranë Spitalit Bashkiak “Stefan Gjoni” Krujë me komplikacione shëndetësore, të cilat dyshoheshin si shkak prej konsumimit të ujit të pijshëm, sqarojmë si vijon :

Menjëherë, si masë e parë prej dyshimit të ngritur, në orën 10:30 të ditës së Hënë, Ujësjellës Kanalizime Krujë sh.a ka ndërprerë furnizimin me ujë të pijshëm për banorët e qytetit të Krujës dhe nga ana e Njësisë Vendore të Kujdesit Shëndetësor janë kryer analizat e ujit në burim, në depot e qytetit dhe në pikat fundore të rrjetit shpërndarës. Gjithashtu, nga ana e Institutit të Shëndetit Publik janë marrë mostra të ujit dhe disa kampione tek pacientët e hospitalizuar për të analizuar dhe gjetur shkaqet më të detajuara.

Nga të dhënat paraprake të analizave fiziko-kimike të deritanishme, dyshohet se reshjet e dendura të shiut ditën e shtunë pasdite dhe në orët e para të ditës së dielë, në të gjithë territorin e Bashkisë Krujë dhe në veçanti në Malësinë e Krujës ku ndodhen veprat e marrjes së ujësjellësit, të kenë sjellë kontaminimin e ujit të pijshëm, ku paraprakisht është konstatuar prezencë e amoniakut mbi normë. Gjithsesi ky rast mbetet për tu verifikuar pasi analizat periodike te kryera nga laboratorët e NjVKSh përpara kësaj periudhe, kanë rezultuar të jenë në norma optimale.

Dje janë analizuar edhe mostrat e ujit nga veprat e marrjes në Shkretë dhe në burimin e Livadheve, ku parametrat fiziko – kimike të të cilëve kanë rezultuar të jenë vazhdimisht brënda normave. Sot, janë analizuar nga NjVKSh mostrat e marra nga depozitat e qytetit të cilat kanë rezultuar brënda normave të lejuara. Gjithsesi, jemi në pritje edhe të analizave më të detajuara mikro – biologjike nga ISHP, të cilat do të japin të dhëna më të detajuara të normave të komponentëve të ujit dhe do të shërbejnë për çertifikimin e furnizimit në vijim të popullatës me ujë të pijshëm.

Përsa i përket furnizimit të popullatës me ujë të pijshëm në ditët në vijim, sqarojmë se UKK Krujë po vijon me dezinfektimin e depove të qytetit me anë te proçesit të klorinimit, ndërkohë analizat fiziko–kimike dhe ato mikrobiologjike do të çertifikojnë ri-fillimin e furnizimit me ujë të pijshëm për banorët. Në mënyrë që të shmanget çdo rast i mëtejshëm kontaminimi, kërkohet që të mos konsumohet uji në depozitat familjare dhe dhe të bëhet zbrazja e tyre me qëllim pastrimin përfundimtar të rrjetit deri në pikat fundore. Ndërkohë që autorizimi i përdorimit të ujit të pijshëm do të njoftohet nga UKK Krujë dhe Bashkia Krujë, pas çertifikimit të analizave përfundimtare nga ISHP të pikave fundore të shpërndarjes në të gjitha zonat e qytetit të Krujës.

Ekipi i punës i ngritur për manaxhimin e situatës me specialistët e UKK Krujë, Spitalit bashkiak të Krujës, Njësisë Vendore e Kujdesit Shëndetësor si dhe Institucioneve të tjera lokale dhe Qendrore, janë në gatishmëri për t’Ju përgjigjur kësaj situate deri në normalizimin e saj, situate e cila fatmirësisht po shkon drejtë stabilizimit pas komunikimeve të fundit me Spitalin Bashkiak.’- njofton ujësjellësi i bashkisë Krujë.

Deputetja e Partisë Demokratike Grida Duma thotë se përgjegjës për vuajtje e krutanëve për shkak të helmimit të ujit është vetë qeverisja. Duma kërkon që hetimet të zbardhin të vërtetën.

‘Mbi 300 numri i të helmuarve nga uji, siç thonë vetë të shtruarit në spitale. Kjo katastrofë ka prekur fëmijë e të moshuar. Vuajtjet e sotme të krutanëve janë përgjegjësi e shkaktarëve të qeverisjes. Kujtojmë kur pikërisht për ujësjellësin në Krujë, Kryeministri bënte xhiron e cirkut të lëvizshëm të propagandës se vet të neveritshme. Hetimet duhet të zbardhin të vërtetën, kush luan me ujin, luan me jetën.’- shkruan deputetja e PD-së.

Pas më shumë se 5 orësh nga deklarata e prefektit të Durrësit, Roland Nasto i cili tha se në Krujë do të shpërndahej ujë falas, pas ndërprerjes së furnizimit për shkak të helmimeve masive, ende banorët nuk kanë parë asnjë autobot me ujë.

Gazetari i Report Tv, Arsen Rusta, i cili po ndjek nga afër situatën e krijuar në qytetin e Krujës, tha se deri tani asnjë koli me ujë të pijshëm falas nuk shpërndarë në qytet për banorët. E madje asnjë bot që të furnizojë institucionet publike, siç u tha nga prefekti.

Partia Demokratike ka akuzuar qeverinë dhe institucionet si përgjegjëse për situatën e krijuar në Krujë, ku 370 qytetarë janë helmuar dhe dyshimet e para janë se shkak është bërë uji i pijshëm. Në spital, ku panë nga afër gjendjen e pacientëve, ishin deputete e PD, Oriola Pampuri dhe Dhurata Çupi.

Pampuri theksoi se ujësjellësi i Krujës u inagurua nga Rama vetëm pak para zgjedhjeve të 25 prillit, duke hedhur akuza se tenderi ishte korruptiv. Ajo vurio theksin edhe tek kushtet e spitalit të Krujës, që i konsideroi si shumë të rënda.

"Vizituan pacientët, kushtet spitalit linin shumë për të dëshiruar. Një numër kaq i larët personazh që janë helmuar, s'mund të jetë nga një ushqim sepse nuk kanë qenë në të njëjtin vend. Aludohet për ujin, ndërkohë kujtojmë që Edi Rama inaguroi tenderin korruptiv për ujësjellësin para zgjedhjeve. Sot është prekur jeta e qytetarëve për shkak të tenderave korruptiv të kësaj qeverie. Nuk dua ta politizoj situatën, por korrupsioni i qytetarëve i kushtoi sigurinë e jetës qytetarëve", tha Pampuri.

Deputetja Dhurata Çupi kërkoi që organet et drejtësisë të marrim masa për hetimin e kësaj çështje.

"Ne takuam qytetarët, një djalë 10 vjeç po ashtu i helmuar që e takuam në spital. Aludohet që mund të jetë nga uji. Ku janë organet e drejtësisë, çfarë masash ka marrë prokuroria për të siguruar provat? Pse nuk ka një sqarim se çfarë po hetojnë ata në lidhje me këtë çështje. Është masiv helmimi. Institucionet duhet të veprojnë në mënyrë urgjente", theksoi ajo.

Si 'han pa porta', kështu duket ujësjellësi në Krujë, ku mungojnë thuajse tërësisht masat e sigurisë. Uji dyshohet shkaku kryesor i helmimeve masive në Krujë, ku 370 qytetarë u paraqitën në spital për të kërkuar ndihmë, mes të cilëve edhe adoleshentë dhe 70 fëmijë, e nëse analizat do të vërtetojnë këto dyshime, nuk do të jetë një çudi.

Atë çfarë kërkon ligji për masat shtesë të sigurisë publike, në pikat që konsiderohen të një rëndësie të veçantë siç janë depot e ujit apo ujësjellësit, janë neglizhuar tërësisht në ujësjellësin e Krujës.

Në një vëzhgim të 'Report Tv' në terren rezulton se nuk ka roje që të mbrojë subjektin dhe e vetmja masë sigurie është një dry që mbyll portën e rrethimit të jashtëm, por që hapet lehtësisht me dorë. Po ashtu mungojnë edhe kamerat e sigurisë, ndërsa edhe kangjellat e rrethimit mund të kapërcehen krejt lehtësisht nga kushdo.

Ujësjellësi i Krujës u inagurua vetëm pak muaj më parë, gjatë fushatës elektorale, ndërsa qytetarët e Krujë konsumojnë masivisht ujin e rrjetit.

Qytetarët kanë filluar të shfaqin probleme shëndetësore, si dhimbje koke, dhimbje barku, diarre e të vjella që prej mëngjesit të djeshëm, e teksa dyshimet janë përqendruar te helmimi nga uji, furnizimi me ujë u ndërpre që prej mesditës së djeshme.

Ndërkohë janë marrë mostrat e ujit dhe përgjigjet e analizës epidemiologjike pritet të bëhen publike në orët në vijim.

I pyetur nga gazetari i Report Tv, Arsen Rusta, se si do të zgjidhet situata e banorëve të Krujës, të cilët tashmë kanë mbetur pa ujë për shkak të ndërprerjes së furnizimit pas helmimeve masive, Prefekti i Durrësit, Roland Nasto, ka bërë me dije se do të shpërndahet ujë falas.

"Do merren masa nga pushteti lokal që të gjithë banorët do të marrin ujë të pijshëm, do shpërndajmë me autobot dhe koli për ujë të pijshëm", tha ai.

Ministrja e Shëndetësisë, Ogerta Manastirliu, e pranishme në spitalin e Krujës, ku janë paraqitur 370 pacientë me simptoma helmimi, theksoi se tashmë kanë nisur hetimet epidemiologjike. Ndonëse dyshimet janë përqendruar kryesisht në helmimin nga uji i pijshëm, Manastirliu tha se po hetohet në disa pista.

"Kam ardhur për të parë nga afër gjendjen shëndetësore të qytetarëve që marrin shërbim në spitalin e Krujës. Situata paraqitet e qetë, pa komplikacione, nuk kemi ndonjë qytetar me gjendje të komplikuar shëndetësore. Janë rreth 370 qytetarë që janë paraqitur në spital ku kanë marrë shërbimin e nevojshëm. Sot janë paraqitur 60 qytetarë. Tashmë janë edhe disa pacientë të tjerë që po marrin shërbim në urgjencë, janë rreth 30 qytetarë aktualisht. Ka edhe adoleshentë, fëmijë e të rritur. Sa i përket hetimit epidemiologjik, të gjithë strukturat e Ministrisë së Shëndetësisë dhe Bashkisë po kryejnë të gjitha investigimet në të gjitha pista e mundshme. Janë marrë mostrat e ujit dhe ushqimeve, janë një seri pistash që po investigohen. Po pyeten të gjithë qytetarët se çafër kanë konsumuar dhe do kemi rezultat përfundimtar kur të kemi rezultatin e analizave mikrobiologjike. Kemi marrë masa që nëse do të ketë raste të shtuara edhe spitali i Durrësit mund të vendoset një pavion për të pritur pacientët. hetimet po kryhen në shumë pista", tha ministrja.

Përfaqësues të Inspektoratit Shtetëror të Shëndetit në spitalin e Krujës

Përfaqësues të Inspektoratit Shtetëror të Shëndetit kanë shkuar në spitalin e Krujës ditën e sotme, për të kryer inspektime në lidhje me situatën e krijuar, pas shtrimit të numri i të lartë qytetarësh që janë paraqitur me simptoma helmimi. Dyshohet se helmimi është shkaktuar nga uji i pijshëm, ndërsa bëhet me dije se Inspektorati i Shëndetit i ka kërkuar llogari ujësjellësit të Krujës se përse nuk kanë njoftuar që të dielën, ku u shfaqen rastet e para të helmimit, për problemin, njoftim të cilin theksojnë se e kanë marrë vetëm dje.

320 qytetarë dyshohet se janë helmuar nga uji i pijshëm në Krujë. Prej mëngjesit të së dielës qytetarët i janë drejtuar spitalit, për shkak të problemeve shëndetësore.

Ende nuk dihet shkaku i saktë i helmimit të tyre, ndërsa mësohet se mes pacientëve janë edhe 60 fëmijë. Lidhur me këtë ngjarje ka reaguar përmes një statusi në rrjete sociale Presidenti Ilir Meta.

Kreu i shtetit thekson se situata është alarmante, ndërsa shton se duhet trajtuar me përgjegjësi dhe seriozitet nga institucionet shtetërore, përgjegjëse për shëndetin publik.

Presidenti Meta shton se ju uron shërim sa më të shpejtë qytetarëve, ndërsa përgëzon ekipet mjekësore për këjdesin dhe profesionalizmin e dëshmuar derimë tani.

“Me shqetësim po përcjell helmimin në masë të banorëve të Krujës, një situatë alarmante, që duhet trajtuar me shumë përgjegjësi dhe seriozitet nga institucionet shtetërore përgjegjëse për shëndetin publik, por edhe nga drejtësia.

Qytetarëve të helmuar, ju uroj shërim sa më parë dhe tejkalimin pa pasoja të rënda dhe afatgjata, si dhe ju shpreh familjeve të tyre të gjithë solidaritetin!

Mbështes dhe përgëzoj ekipet mjekësore për kujdesin dhe profesionalizimin e dëshmuar derimë tani dhe i nxis shërbimet shëndetësore epidemiologjike dhe ato të mjekësisë ligjore të zbardhin sa më parë burim shkakun dhe shkaktarët dhe përgjegjësit e kësaj ngjarjeje të rëndë, që përbën një kërcënim serioz për jetët njerëzore dhe Sigurinë Kombëtare.”-shkruan Meta në rrjete sociale.

Një pacient i shtruar në spitalin e Krujës pasi ka patur shenja helmimi, ka treguar edhe foton e filtrit të ujit që ai ka vendosur në banesën tij, ku duket qartë ndotja e lartë. Filtri është bërë i zi, duke treguar cilësinë e dobët të ujit që i shkon në çezma banorëve të Krujës. Pacienti tregon se e njëjta situatë është përsëritur edhe para tre muajsh, ku ata kanë patur të njëjtat simptoma helmimi.

"Filtri i ujit në banesën time, unë e ndërroj një herë në muaj. Është shumë i ndotur. Po e le 3-4 muaj bëhet kështu. Kjo ka ndodhur edhe para tre muajsh, kemi patur kështu shqetësimesh", thotë ai.