Një lojë imazhi proamerikan, e perëndimor, edhe pse ndjenjat e komunitëve shqiptarë që morën pushtetin ishin thellësisht proruse....Një analizë e hollë e gjithë mesazheve të dhëna nga komunistët në ditët e fundit të nëntorit, nga përdorimi i yllit të kuq pesëcepësh, flamujt nëpër podiume, nderimi me pëllëmbën e shtrirë si angloamerikanët, elementi femëror në paradën e organizuar në kryeqytet, etj...

Shumë shpejt, vetëm pak muaj pasi Josip Broz Tito kishte marrë pushtetin në Beograd, në 1945, njëri prej funksionarëve të lartë britanikë u shpreh i shtangur prej kursit prostalinist që mori menjëherë qeverisësi i ri i Jugosllavisë. Londra pati investuar për rezistencën partizane të këtij vendi pothuaj dy duzina me misione të SOE, Operacioneve Ekzekutive Speciale, madje pranë shtabit të Titos kishte sjellë, si këshilltar të posaçëm, deri edhe vetë të birin e kryeministrit Çërçill, Randolfin, dhe në të tëra herët, kur binte fjala për sistemin politik pas mbarimit të luftës, Tito qe zotuar pa asnjë mëdyshje se nuk do të krijonte aspak një shtet komunist.