Humbën 12 orë në det, Marku:
Telefonuam 129, nuk u përgjigjën

DURRES -   Ishte planifikuar të ishte një shëtitje e bukur në mes të detit, por është kthyer në ankth për familjarët e 3 adoleshentëve nga Spilleja e Durrësit.
 
Pasditen e së dielës (dje) rreth orës 16:00 Florian Gjoka 17 vjeç, Oreld Nikolli 16 vjeç dhe Vilson Marku,16 vjeç i kanë marrë me qera një varkë me pedale nga zona e bregdetit të Kallmit dhe kanë dalë për shëtitje në det të hapur.
 
Kur kanë kaluar disa orë dhe familjarët kanë parë që adoleshentët nuk po ktheheshin prindërit e Florianit janë paraqitur në Drejtorinë e Policisë Qarkut, për të njoftuar për largimin e tre adoleshentëve.

Denoncimi është bërë mbrëmjen e së dielës 25 gusht, rreth orës 22:00.

Policia e Durrësit informoi sot se kërkimet kanë vijuar përgjatë gjithë natës dhe vetëm mëngjesin e sotëm, është bërë lokalizimi i vendndodhjes së mjetit lundrues së bashku me të rinjtë të zonën e bregdetit të Sektorit Rinia, të cilët rezultuan në gjendje të mirë shëndetësore. Bashkë me policinë kufitare u angazhua edhe Guardia di Financa.
 
16 VJECARI RREFEN AVENTUREN NE DET
16 vjeçari Vilson Marku tregon për A1 Report si nisi dhe si përfundoi aventura.

“Ne u nisëm për nje shëtitje me varkë në sektorin Rinia, rreth pasdites, ishim tre shokë kishim marrë birrë dhe ushqime me vete. Unë kisha harruar celularin në shtepi ndaj nuk munda të lajmëroja familjen time.
Ne pa e kuptuar shkuam pak më larg se sa duhet, u përpoqëm të lidhemi me familjet por ceulari nuk kishte valë. Ne vumë re se kishim shkuar shumë larg dhe pastaj morëm rrugën e kthimit.
I kemi rënë 129 po nuk na ka dalë nga ora 00:00 nja dy tre herë pastaj erdhëm vetë. Rreth orës 05:00 të mëngjesit u kthyem në tokë në sektor “Rinia” kur erdhen dhe na gjetën edhe familjarët tanë. “
 
Pas gati 12 orësh të humbur tre adoleshentët u gjetën sot në mëngjes pranë plazhit në sektorin ”Rinia” të Durrësit.  
  

(Foto: Vilson Marku, një nga 3 adoleshentët që humbën 12 orë në det)

Redaksia online 
(sg/shqiptarja.com)