Një 37-vjeçar nga Vlora i shpallur në kërkim ndërkombëtar për trafik të lëndëve narkotike është arrestuar nga policia.

Bëhet fjalë për Denis Hysaj banues në fshatin Gjormë të Vlorës, të cilin gjykata e Romës në Itali e ka dënuar në vitin 2018 me 8 vite burg.

Autoritetet shqiptare po kryejnë procedurat për ekstradimin e tij në Itali.

Njoftimi i Policisë

Kapet një tjetër person i shpallur në kërkim ndërkombëtar për veprimtari kriminale në fushën e narkotikëve.

Operacioni, nga Drejtoria Vendore e Policisë Vlorë, në bashkëpunim me Interpol Tirana.

Vihet në pranga 37-vjeçari i dënuar me 8 vite burg, me qëllim ekstradimi drejt shtetit italian.

Strukturat e Drejtorisë Vendore të Policisë Vlorë, në vijim të punës intensive për kapjen e personave të shpallur në kërkim kombëtar e ndërkombëtar, si dhe mbi bazën e informacioneve të marra në rrugë operative, kanë kapur dhe arrestuar provizorisht, me qëllim ekstradimi, shtetasin:

Denis Hysaj, 37 vjeç, banues në fshatin Gjormë, Vlorë.

Ky shtetas ishte shpallur në kërkim ndërkombëtar, pasi Gjykata e Romës, Itali, me vendimin e datës 16.11.2018, e ka dënuar me 8 vite burgim, për veprën penale "Trafikimi i lëndëve narkotike".

Materialet i kaluan Prokurorisë pranë Gjykatës së Shkallës së Parë Vlorë, për veprime të mëtejshme.