Një burrë ukrainas, Boris Romantschenko, i cili i mbijetoi Holokaustit nazist gjatë Luftës së Dytë Botërore është vrarë gjatë një sulmi rus në qytetin lindor të Ukrainës, Kharkiv. Të afërmit e Romantschenko, 96 vjeç, thanë se ai vdiq gjatë bombardimeve ruse të premten në bllokut e apartamenteve ku jetonte.
Forcat ruse kanë bombarduar pa pushim Kharkivin dhe të paktën 500 civilë janë vrarë tani atje, thonë zyrtarët ukrainas. Fondacioni Buchenëald dhe Mittelbau-Dora Memorials tha se ishte "thellësisht i shqetësuar" nga vdekja e Romantschenko. Organizata, nënkryetar i së cilës ishte Romantschenko, njoftoi lajmin pasi u informua nga familja e tij dhe tha se ai "kishte punuar intensivisht në kujtimin e krimeve naziste".
"Ne vajtojmë humbjen e një miku të ngushtë. I urojmë djalit dhe mbesës së tij, që na sollën lajmin e hidhur, shumë forcë në këto kohë të vështira", thuhet në deklaratën e fondacionit.
![]()
Romantschenko lindi në qytetin verilindor të Bondarit më 20 janar 1926. Ai u arrestua nga trupat naziste në moshën 16-vjeçare pas pushtimit të Bashkimit Sovjetik dhe u deportua në Gjermani në vitin 1942, ku u detyrua të bënte punë të rënda, tha fondacioni.
Pas një përpjekjeje të dështuar arratisjeje në vitin 1943, ai u dërgua në kampin e përqendrimit Buchenëald, ku rreth 56.545 njerëz u vranë para çlirimit të tij në 1945 nga aleatët.
Ai gjithashtu kaloi kohë në nënkampin e Mittelbau-Dora, si dhe në kampet famëkeqe Bergen Belsen dhe Peenemünde. Vdekja e Romantschenko vjen më shumë se tre javë pasi presidenti Vladimir Putin u përpoq të justifikonte pushtimin e tij ndaj popullit rus duke i thënë atyre se qëllimi i tij ishte "de Nazifikimi i Ukrainës".
Udhëheqësit perëndimorë i kanë dënuar këto pretendime të presidentit rus dhe kanë theksuar se presidenti i Ukrainës, Volodymyr Zelensky, është hebre./ Përshtati nga BBC Shqiptarja.com
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)