I vuri tritol farmacisë së Tahirit
ekstradohet Baftjar Bruka

Ekstradohet nga Suedia Baftjar Bruka, 24 vjeç, i cili akuzohet nga Policia për vendosjen e  tritolit në farmacinë e babait të Ministrit të Brendshëm  tek farmacia e Bashkim Tahirit babait të ministrit të Brendshëm, Saimir Tahiri. Burime zyrtare nga Policia e Shtetit kanë bërë me dije se ekstradimi i Brukës është bërë mbrëmjen e djeshme nga Interpol Tirana, pasi më datë 25.02.2015 Gjykata e Krimeve të Rënda, i ka vendosur masën e sigurisë “Arrest me burg“, për veprat penale “Vepra për qëllime terroriste“, “Krijim të grupit të strukturuar kriminal“, dhe “Kryerja e veprave penale nga grupi i strukturuar kriminal“. Me veprat penale të ngarkuara ndaj të riut, parashikohet dënimi maksimal “Burgim i përjetshëm”.

Akuza 
Baftjar Bruka dyshohet për vendosjen e bombave me komandim në distancë të vendosura më datën 10 shkurt 2015 në Tiranë, tek farmacisa në pronësi të Bashkim Tahirit, si dhe pranë urës “Vasil Shanto”, tek stacioni i autobuzit. Bomba e vendosur në farmacinë e Bashkim Tahirit ka shpërthyer duke shkaktuar dëme të shumta materiale, ndërsa fatmirësisht nuk ka shpërthyer bomba tjetër e vendosur në stacionin e urbanit, tek ura “Vasil Shanto”. Arrestimi i 24-vjeçarit është bërë i mundur nga autoritetet suedeze, pasi arriti të arratisej nga Shqipëria menjëherë pas ngjarjeve. 

Nipi i Vladimir Gjutës 
Baftjar Bruka, nipi i Vladimir Gjutës, u largua nga Shqipëria dy ditë pas arrestimeve nga policia të anëtarëve të “Grupit të tritolit”. Përveç Vladimir Gjutës, i arrestuar vetëm 1 muaj pas ngjarjeve të ndodhura më 10 shkurt 2015 nga forcat RENEA në tunelin e Kalimashit, për shpërthimin me tritol vazhdojnë të qëndrojnë nën masën “arrest me burg”, Lumjan Matmuja, Kamber Bruka, Erjon Dule dhe Emirjon Gjuta. Ndërsa pas disa ditë qëndrimi në burg është liruar Ernest Gjuta për mungesë provash që e implikojnë në shpërthimin me tritol. Sipas hetimeve, Vladimir Gjuta, në bashkëpunim me nipin e tij Baftjar Bruka dhe personat e tjerë të arrestuar, dyshohen se janë pjesë e grupit që vendosi tritolin në farmacinë e babait të ministrit të Brendshëm, por edhe pranë vendparkimit të makinës së tij. Baftjar Bruka ishte shpallur gjithashtu në kërkim ndërkombëtar edhe nga autoritetet italiane, ku dyshohet se bashkë me një xhihadist sirian, kishin planifikuar sulme terroriste në qytetin e Venecias.

Kush është Baftjar Bruka 
I arrestuari Baftjar Bruka, 24 vjeç, ka lindur në Kukës dhe është banues në Tiranë. Ai është një emër i njohur për drejtësinë shqiptare, pasi ka precedentë kriminal. Ai është hetuar në vitin 2013 për veprën penale “Vrasje me dashje në bashkëpunim, mbetur në tentativë” dhe “Armbajtje pa leje”. Çështje, e cila më pas është pushuar nga Gjykata e Shkallës së Parë të Rrethit Gjyqësor Kukës. Bruka dyshohet se është pjesë e “bandës së tritolit” dhe ka qenë personi që ka vendosur lëndën shpërthyese te farmacia e babait të ministrit të Brendshëm. 

Bombat 
Baftjar Bruka dyshohet për vendosjen e bombave me komandim në distancë të vendosura më datën 10 shkurt 2015 në Tiranë

Ai është nipi i Vladimir Gjutës, që u kap disa muaj më parë në afërsi të tunelit të Kalimashit në Kukës.

Bruka kishte kohë që ishte shpallur në kërkim dhe i fshihej autoriteteve.


Redaksia Online
(F.T/shqiptarja.com)

TAG:
• vladimir gjuta