VLORË- Një ide origjinale proteste, ka ardhur nga bizneset në Vlorë, të cilët kërkojnë shtyrjen e orarit të muzikës dhe heqjen e orës policore, për shkak të vështirësive ekonomike, së po hasin në këtë sezon turistik, pas pandemisë.

Pjesa më e madhe e bizneseve kanë zgjedhur në shenjë proteste të vendosin njëherazi në orën 21:45, Himnin Kombëtar, me zë të lartë, pak para mbylljes së orarit muzikor, i cili është ora 22:00. Himni Kombëtar, dëgjohet në çdo biznes, ndërkohë që nuk mungojnë edhe qytetarët e shumtë, apo turistët, të cilët janë ulur për të shijuar ndonjë pije në lokalet në Vlorë.

Ndërkohë forca të shumta policie kanë mbërritur në Lungomaren e Vlorës, pak pas protestës simbolike të bizneseve, me qëllim monitorimin e respektimit të orës policore. Disa prej pronarëve të bizneseve kanë refuzuar ta mbyllin aktivitetin e tyre dhe janë përplasur me efektivët. Policia mësohet se ka shoqëruar një administratore lokali.

Pak ditë më parë, bizneset në Vlorë, dolën në një protestë paqësore para drejtorisë së Policisë së Qarkut, ku paraqitën kërkesat e tyre për hapjen e orarit zyrtar pas orës 24:00 si dhe shtyrjen e orarit të muzikës përtej orës 22:00, që sipas tyre i dëmton biznesin, ndërsa u shprehën se policia zbaton ligjin në mënyrë selektive.

Kujtojmë se nga 1 qershori, Komiteti Teknik i Ekspertëve, lehtësoi disa nga masat anti-COVID, por klubet e natës dhe diskot vijojnë të jenë të do të jenë të mbyllura, ndërsa muzika lejohet deri në orën 22:00.

Rendit zhvillimet sipas orarit:
Ora 22:52
Kundërshton policinë, efektivët shoqërojnë administratoren e një lokali në Lungomare

Forca të shumta të policisë kanë mbërritur në Lungomare në Vlorë, pak pas protestës së biznesve, ku në shenjë simbolike vendosën të luanin të gjithë së bashku Himnin Kombëtar.

Disa prej pronarëve kanë refuzuar që të fikin muzikën, në lokalet e tyre duke u përplasur kështu edhe më efektivët e policisë. Ndërkohë që ka pasur edhe të shoqëruar, për kundërshtim të zbatimit të masave anti-COVID. Mësohet se është shoqëruar në polici, administratorja e një lokali në Lungomare, e cila ka kundërshtuar mbylljen e aktivitetit të saj.

M.Q./Shqiptarja.com

Ora 22:44
Pak pas protestës me Himin Kombëtar kundër ndalimit të muzikës, policia ‘zbarkon’ në bizneset në Vlorë

Në orën 22:00, kur muzika duhet të fiket nga të gjitha bizneset, si një nga masat anti-Covid, policia ka zbarkuar në lokalet në Vlorë.

Pak pas protestës, ku të gjitha lokalet vendosën me zë të lartë Himnin Kombëtar, efektivë të shumtë policie janë parë përgjatë bizneseve në Vlorë, me qëllim monitorimin e respektimit të orës policore nga ana e bizneseve.

M.Q./Shqiptarja.com