Kryetari i Partisë së Lirisë, Ilir Meta pretendon se synimi i vetëm i qeverisë Rama është të largojë shqiptarët nga vendi dhe të sjellë shtetas të huaj. Ky reagim i ish presidentit vjen pas vendimit të Këshillit të Ministrave që tregon se  qeveria vendosi “zbatimin e procedurave të koncesionit/partneritet publik privat në sektorin e programeve të shtetësisë”.

Sipas Metës, Rama po bën një aventurë që të lërë shqiptarët të largohen dhe të sjellë punëtorë nga Bangladeshi dhe me ironi thotë se “me ata do të anëtarësohet në BE”.

“Nëse do të merremi me të gjitha skandalet që prodhon çdo ditë kjo qeveri, merremi. Por është edhe dëshira e kësaj qeverie që të zhvendosim vëmendjen nga prioritetet më të mëdha të vendit tonë. Kjo është një aventurë, siç është aventurë e shpallur që të lëmë të ikin shqiptarët se na vijnë punëtorë nga Bangladeshi e me ata do të anëtarësohemi në BE. Dhe kjo është në vazhdën e kësaj logjike. Të ikin shqiptarët dhe të sjellim të pasur. Qëllimi është t’i kthejmë ose në shërbëtorë ose ata që kanë mbetur këtu në emigrantë. Këto janë skenarë që nuk do të funksionojnë këtu. Edhe atje e kanë mendjen tek kullat dhe metrat katrorë se kështu nisi kjo punë”, tha Meta.

Sa i përket paralajmërimeve për protesta në shtator, Meta thotë se do të bashkëpunojnë me çdo forcë politike, duke iu referuar kështu edhe Sali Berishës e ‘Rithemelimit’.

“Ne do të dalim në përkrahje të çdo iniciative qytetare, të çdo proteste. Një popull që fle në demokraci, zgjohet në diktaturë. Kjo i ka ndodhur popullit tonë vitet e undit. Ky është zgjim i pandalshëm. Ne bashkëpunojmë me çdo forcë politike, me cdo grup interesi për të vendosur llogaridhënien urgjentisht në këtë vend. Ky është proces i pandalshëm. Historia ka ndryshuar njëherë e përgjithmonë. Këto borxhe ku do i fusë Rama shqiptarët, do i paguajë vetë atij”, tha Meta.

Një thirrje e kishte edhe për punonjësit e administratës që të mos përdoren nga askush.

“I bëj thirrje punonjësve të administratës të mos përdoren si bedela (ai që shkonte në vend të një tjetri në ushtri ose në punë të detyruar kundrejt një pagese). Kemi të bëjmë me aventurierë që në fund fare do thonë fajin e keni ju se ne me kartelë ishim”, tha Meta.