Ironia e Ramës: Basha tre muaj
në çadër, sot s'ka skuadrën gati

CERRIK- Kryeministri Edi Rama ka komentuar nga Cerriku, ku zhvilloi një takim elektoral, listën e paplotë të kandidatëve të Partisë Demokratike për zgjedhjet e 25 Qershorit. 

Rama tha se Basha ende nuk ka ngritur ekipin për t'u bërë pjesë e zgjedhjeve.

Kreu i qeverisë iu referua listës së kandidatëve të PD e cila është dorëzuar në KQZ me vetëm 94 emra, nga 140 të mundshëm, ndërsa i është lënë një afat 24 orësh nga inistitucioni i administrimit të zgjedhjeve, për të plotësuar emrat.

[gallery]22478[/gallery]

"Basha ia vrau bashkëpunëtorët Berishës"
Sipas Ramës, Basha ia vrau bashkëpunëtorët Berishës në PD.

Ai shtoi se kreu i PD e ka lënë ish-kryeministrin si "Fanti Spathi", të vetëm. 

"U mbyll në çadër tre muaj dhe thoshte nuk ka vetting pa ikur Edi Rama, Edi Rama është këtu, Vettingu ka ardhur.

Tre muaj në çadër për të bërë Republikën e Re pa Edi Ramën, edhe e patë...akoma sot nuk ka bërë gati të gjithë skuadrën ta nxjerrë në fushë. E sigurt është që Saliut ia vrau të gjithë bashkëpunëtorët dhe e la tekpull si Fanti Spathi atje në mes", tha Rama.  

"Vota, jo për t'u gjetur punë njerëzve që s'dinë të bëjnë punë"
Zgjedhjet e 25 qershorit, tha Rama, do vendosin për ndërtimin e Shqipërisë së përbashkët Europiane ose për kthimin pas, për rrënimin e shtetit. 

Sipas kreut të qeverisë, qytetarët nuk do votojnë për t'u gjetur punë atyre që s'punojnë. 

"Ne nuk e kemi akoma shtëpinë e përbashkët të shtetit tonë, por në 25 Qershor do vendosim ose do të ndërtojmë shtëpinë e përbashkët të shtetit europian të shqiptarëve, ose do të kthehemi pas për të parë një tjetër kapitull, atë të shkatërrimit nga e para të shtetit. 

Zgjedhjet, vota, nuk janë si një ndeshje. Vota është për të marrë në punë njerëzit e duhur për të bërë punë. Vota nuk është për t'u gjetur punë njerëzvë që nuk dinë të bëjnë punë. 

Shumë thjesht mund t'ua them të gjithë demokratëve, nëse doni të niseni nga Cerriku në Tiranë, keni mundësi të shkoni me makinë, ose karrocë dhe nuk e pyesni shoferin a je i PS apo i PD. Po morët karrocët, do mbërrini në Tiranë pas shtatë ditësh. Kështu është edhe qeveria, është për të bërë punë.

Kur është fjala për të zgjedhur Kryeministrin, ti mund të jesh me PD, të bëhet kryeministër Luli? Luli ishte 4 vjet kryetar i Bashkisë së Tiranës, sahatin e Tiranës e kishte katër vjet pas zyrës dhe sahati katër vjet nuk punoi. Tjetër sahat ka Tirana, tjetër sahat Luli 12, ora e Lulit është 12 sahati". 

Kryeministri Rama në fjalën e tij në Cerrik - Pjesa e Parë


Kryeministri Rama në fjalën e tij në Cerrik - Pjesa e Dytë

TAG:
• kqz