Iu gjetën mbi 60 kg kokainë në anijen me qymyr në portin e Durrësit! SPAK liron ekuipazhin dhe i heq sekuestron anijes

SPAK ka liruar 16 marinarët të cilëve iu gjetën 60 kilogramë kokainë në anijen me qymyr në portin e Durrësit. Vendimi është dhënë ditën e djeshme ndërsa mësohet se anijes i është hequr sekuestro. 

Sasia e konsiderueshme prej mbi 60 kg kokaine u  zbulua në orët e para të mëngjesit të 16 majit, e cila ishte vendosur në një anije me qymyr që vinte nga Kolumbia. Kokaina u kap në hambarin e anijes "Unistream" me flamur të Antigua Barbuda nga Ishujt Karaibe. Ajo ishte e ndarë në 53 pako, në 2 çanta dhe deri më tani bëhet fjalë për 60 kg, teksa kontrolli do të vijojë sërish rreth orës 10:00, pasi droga ishte futur mes qymyrit. Policia bëri kontroll me qen antidrogë, por nuk e pikasën kokainën, për pasojë do të kontrollohet gjithë sasia e qymyrit prej 6500 ton.

Kapiteni i anijes ishte nga Rusia. Kanë qenë partnerët ndërkombëtar që kanë sinjalizuar Policinë Shqiptare për sasinë e drogës dhe më pas është kryer edhe operacioni nga Task Forca e Durrësit që zbuloi kokainën në anijen që sillte qymyr nga Kolumbia. Gjatë kontrolleve të ekuipazhit i shoqërroi vetë kapiteni, i cili u shpreh se nuk mban përgjegjësi për ngarkesën dhe iu tha se kanë kontrolluar dhe një ditë më parë, por nuk gjetën asgjë.

Gazetari i Report Tv, Artur Korriku mësoi edhe Itinerarin që ka ndjekur anija "Unistream" deri sa ka mbërritur në portin e Durrësit. Ajo është nisur nga porti i Barranquilla në Kolumbi në 26 prill në orën 11:32 dhe ka mbërritur në Portin e Durrësit në 16 maj, pra një ditë më parë në orën 08:32. Nuk dihej nëse sasia e drogës kishte si destinacion final Shqipërinë apo porti i Durrësit ishte përdorur si tranzit nga trafikantët.

Të prangosur dhe në shoqërinë e oficerëve të policisë ata ju drejtuan sallës së GJKKO më 19 korrik duke kërkuar marrjen e pasaportave të tyre për t’u rikthyer në shtëpi. Kërkesa e tyre u refuzua ndërsa mbrojta kërkoi përjashtimin e gjyqtarit Erion Çela nga ky proces me argumentin se ai ka vendosur më herët edhe sekuestron e anijes.

Anija ishte në pronësi të kompanisë Gjermane “MS Unistream & CO.KG”, ndërsa me vendim sekuestro ajo u konsiderua si provë materiale nga SPAK për llogari të hetimit për trafik ndërkombëtar droge.

Stafi i bordit të anijes ishin 7 filipinas, 4 Rus, 1 Ukrainas të cilët edhe pse vendet e tyre i kanë në luftë me njëri tjetrin në sallën e gjykatës ishin miqësor.

Prokuroria e Posaçme në përfundim të seancave për heqjen e sekuestros dërgoi në zyrat e Byrosë kombëtare të hetimit stafin e marinarëve pasi ata do pyeten në cilësinë e personave që kanë dijeni për rrethanat e hetimit.

G.MO//Shqiptarja.com

TAG:
• GJKKO
• spak
• porti i durresit
• kokaine
• droge
• Durres