Japonia përgatitet të rrëzojë mbetjet e satelitit 'spiun' të Koresë së Veriut

Japonia ka aktivizuar përgjuesit e raketave dhe po përgatitet të asgjësojë çdo pjesë të mundshme nga një satelit i Koresë së Veriut që mund të bjerë në territorin japonez.

Ministri i Mbrojtjes, Yasukazu Hamada udhëzoi të shtunën trupat të përgatisin raketat tokë-ajër PAC-3 në Japoninë jugperëndimore, duke përfshirë Okinawa dhe ishujt e afërt, në një zonë që besohet të jetë nën një shteg fluturimi të një rakete koreano-veriore që do të transportojë satelitin.

Ai urdhëroi gjithashtu vendosjen e shkatërruesve të pajisur me raketa në ujërat bregdetare, sipas një deklarate të ministrisë.

“Ne po bëjmë përgatitjet e nevojshme për shkak të mundësisë së lëshimit të një urdhri për të shkatërruar raketat balistike dhe objekte të tjera”, thuhet në deklaratë.

Hamada udhëzoi trupat që të zbatojnë masat e nevojshme për të kufizuar dëmtimin në rast të rënies së një rakete balistike. Urdhri për të lëshuar raketa duhet të miratohet nga kryeministri.

Udhëheqësi i Koresë së Veriut Kim Jong Un tha në fillim të kësaj jave sateliti i parë ushtarak spiun do të lëshohet në një datë të pacaktuar.

Në 2012 dhe 2016, Koreja e Veriut testoi raketa balistike që Pheniani i quajti lëshime satelitore. Të dy raketat fluturuan mbi rajonin e Okinawas.

"Prova e pushtimit"

Koreja e Veriut ka testuar rreth 100 raketa që nga fillimi i vitit të kaluar, duke thënë se po i përgjigjej manovrave të përbashkëta ushtarake SHBA-Kore Jugore që i quan një provë pushtimi. Disa nga raketat fluturuan mbi Japoni ose u ulën në brigjet veriore japoneze.

Javën e kaluar, Koreja e Veriut testoi për herë të parë një raketë balistike ndërkontinentale me lëndë djegëse të ngurtë. Koreja e Veriut pritet të kryejë më shumë teste armësh ndërsa Shtetet e Bashkuara dhe Koreja e Jugut vazhdojnë stërvitjen e tyre të përbashkët ajrore në javën e ardhshme.

B.V/Shqiptarja.com

TAG:
• Japoni
• Koreja e veriut