Juratovic: Shqipëria rrugë të pakthyeshme drejt Bashkimit Evropian

Ministri në Detyrë për Evropën dhe Punët e Jashtme në kuadër të vizitës së tij në Berlin, zhvilloi një takim me Kryetarin e grupit parlamentar për Evropën Jug-Lindore në Bundestagun gjerman, Josip Juratovic.

Në takim, Ministri në Detyrë Cakaj vlerësoi angazhimin e Bundestagut gjerman në mbështetjen konkrete dhe të gjithanshme që i ka ofruar vazhdimisht Shqipërisë në fushën e reformave, si dhe intensitetin e kontakteve politike te deritanishëm mes përfaqësuesve të Bundestagut me autoritetet Shqiptare.

Duke u ndalur tek hapat e ndërmarra nga Shqipëria në kuadër të përmbushjes së pesë prioriteteve kyçe, Ministri në detyrë Cakaj shprehu bindjen se rezultatet e arritura janë të mjaftueshme për të marrë një përgjigje pozitive në qershor të këtij viti për hapjen e negociatave me Bashkimin Evropian.

Ai theksoi se hapja e negociatave do të ndikojë pozitivisht në rritjen dhe intensifikimin e bashkëpunimit rajonal dhe do të kontribuojë për forcimin e kapaciteteve të vendeve të rajonit për të vijuar reformat që do ta sjellin Ballkanin Perëndimor pranë standarteve të BE-së.

Nga ana e tjeter, Juratovic shprehu të njëjtin mendim sa i takon nivelit të dialogut politik dhe bashkëpunimit intensiv që ekziston mes dy vendeve tona. Ai vlerësoi rezultatet e prekshme të palës shqiptare në reformat e ndërmarra, si dhe nënvizoi rëndësinë e çeljes së negociatave për Shqipërinë në qershor duke e konsideruar një mesazh të fuqishëm për rrugën e pakthyeshme drejt Bashkimit Evropian.

Juratovic theksoi se arritja e marrëveshjes së Prespës përbën një zhvillim tepër inkurajues jo vetëm mes Greqisë dhe Maqedonisë së Veriut por edhe për perspektiven e të gjithë rajonit të Ballkanit Perëndimor. Në këtë kontekst ai vlerësoi se vendet e rajonit duhet të bëjnë më shumë për rritjen e bashkëpunimit rajonal, forcimin e Procesit të Berlinit dhe shprehu gadishmërinë për të mbështetur Shqipërinë dhe vendet e rajonit për më shumë arritje konkrete në këtë drejtim.

G.M./Shqiptarja.com

TAG:
• Gent Cakaj