POP 5

Lajmet më të lexuara të 5 minutave të fundit

Kultura

“K’cimi i Tropojës”, pasuri e botës! Si e ruajnë shqiptarët e si mund ta mësoni kërcimin festiv plot ritual dhe ritëm! Etnografi Haklaj: Jo thjesht valle!

Si mund ta mësoni kërcimin e Tropojës në mënyrë të thjeshtë dhe me pak lëvizje? Të rinj të Ansamblit “Folk Trevar” rrëfejnë më tepër për këtë kërcim, që tashmë është pjesë e Listës Përfaqësuese të Trashëgimisë Kulturore Jomateriale të Njerëzimit.

Këta kërcimtarë të rinj të Ansamblit ‘Folk-Trevar” janë trashëgimtarët e një pasurie të madhe të shpirtit shqiptar, tashmë pasuri e gjithë botës. “K’cimi i Tropojës”, për Skënder Haklajn, nismëtar i grupit të punës për hartimin dhe dorëzimin e dosjes në UNESCO është shumë më shumë se një valle.

“Duhet ta kuptojmë që nuk është valle. K’cimi i Tropojës flet vetë. Është pjesë e brendshme e ritualit, ndërsa vallet janë pjesë sipërfaqësore e ritualit. Pse e brendshme? Sepse flet për ritualin, flet për ritet, për legjendat, tragjeditë, për vetë kulturën e atij populli që jeton në atë mjedis të mrekullueshëm.”, - thotë Haklaj.

Ndër shekuj element identifikues i krahinës së Tropojës, sot, asnjë prej ceremonive festive tradicionale kudo në trojet shqiptare, si: dasma, fejesa, ditëlindje, festa fshati dhe raste të tjera shoqërore, përfshirë ato që janë më pak zyrtare, dhe shpesh mjaft spontane, nuk mund të mendohet pa “K’cimin e Tropojës”.

“K’cimi i Tropojës nga fillestarët mund të mësohet me pesë lëvizje bazë.”, - thotë Rolinda Rrushi, kërcimetare dhe asistent profesore në ansamblin “Folk Trevar”, ndërsa tregon në praktikë se cilat janë këto lëvizje.

Ndërsa nxënës të ansamblit tregojnë se çfarë i shtyu të mësojnë kërcimin e Tropojës. Nga ana tjetër, etnokoreografi Haklaj vëren se interesi për të mësuar kërcimin e Tropojës është shumë i madh, madje edhe të huaj.

“Nuk ka dasmë që nuk bëhet pa “K’cimin e Tropojës”. Tropoja ia dhuroi kombit këtë art të bukur.”

Vallja ka lëvizje ritmike dhe shoqërohet me tupan, çifteli dhe fyell, ndërsa valltarët mbajnë veshje tradicionale dhe shami të kuqe ose të verdhë.

Dosja për “K’cimin e Tropojës” u dorëzua në UNESCO tre vjet më parë bashkë me 'Transhumancën" dhe "Xhubletën", të cilat gjithashtu janë marrë nën mbrojtje nga UNESCO. “K’cimi i Tropojës” është shpallur më herët nga Ministria e Kulturës dhe Akademia e Shkencave në Shqipëri, si pjesë e listës së kryeveprave të Trashëgimisë Kulturore Jomateriale.

B.G/r.k./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 6 Janar, 20:03

    Si iu duket trafiku rrugor në Shqipëri?

Lajme të tjera



×

Lajmi i fundit

Lajçak në SHBA, diskuton për Ballkanin Perëndimor

Lajçak në SHBA, diskuton për Ballkanin Perëndimor

7 Janar, 08:42