Kërkesa/ ​Lul Berisha kërkon lirinë
gjykata i mohon daljen nga qelia

Gjykata e Durrësit nuk ka pranuar një kërkesë për lirim nga qelia të Lulzim Berishës, atij që njihet ndryshe si drejtuesi i bandës së Durrësit. Berisha është dënuar nga Gjykata e Lartë me 25 vite burg, si autor i disa vrasjeve në Durrës. Gjykata e Lartë, pak vite më parë rrëzoi dënimin e përjetshëm të dhënë nga dy gjykatat e Krimeve të Rënda dhe vendosi që Berisha të dënohet me 25 vite burg. Ky i fundit, momentalisht vuan dënimin në spitalin e burgut të Durrësit. Kërkesa për të lënë qelinë është e para e këtij lloji e Berishës, pasi gjatë kësaj periudhe ai ka fituar disa herë ulje dënimi nga gjykata e Durrësit.

Mirëpo kjo e fundit kërkesës së Lulzim Berishës për t’u liruar nga qelia i është përgjigjur në “JO”, duke refuzuar lirimin e tij me kusht. Gjykata ka pranuar kërkesën e prokurorit të Durrësit, i cili ka argumentuar se i dënuari, megjithëse ka treguar maturi dhe korrektësi në vuajtjen e dënimit ,ende nuk përmbush kriteret ligjore për të përfituar nga lirimi me kusht.

Aktualisht Lulzim Berishës i kanë mbetur edhe 6 vite burg. Ai është dënuar nga gjykata me 25 vite burg për krijim të grupeve strukturura kriminale dhe vrasje.

Grupi jashtë
I dënuari me 25 vite burg Lulzim Berisha vijon të mbajë kontakte me anëtarët e grupit. Një raport i ministrisë së Brendshme, i siguruar eksluzivisht nga “Shqiptarja.com”, tregon se Lulzim Berisha mban në mënyrë të paligjshme telefon në burg dhe nëpërmjet tij mban kontakte të vazhdueshme me kunatin e tij, Plaurent Dervishaj dhe anëtarët e tjerë të grupit si Mirel Fjerza, Mond Çekiçi, Julian Meçaj. Në raport vihet re një detaj interesant, pasi Berisha i dënuar me 25 vite burg për një sërë krimesh, vuan dënimin e tij në burgun e spitalit në Durrës, ku qëndron i vetëm në dhomën nr.1 në katin e dytë. Nuk dihet nëse Lulzim Berisha vuan nga ndonjë sëmundje.

Dënimi me Kodin e vjetër
Dy vite më parë Krimet e Rënda vendosën ta dënojnë me burgim Lulzim Berishën, njeriun që u akuzua për një mori krimesh, vrasjesh që kishin të bënin me trafikun e drogës apo me grupin kriminal që ai akuzohej se kishte drejtuar në Durrës. Pas dhënies së vendimit të dënimit, mbrojtja e Berishës apeloi “burgimin e përjetshëm”, por shkalla e dytë nuk ndryshoi asgjë në rrjedhën e fatit të masës së dënimit për kreun e “Bandës së Durrësit”. Mbrojtja e tij vijoi betejën me drejtësinë, duke ditur mirë faktin në të cilin do të zinin ‘mat’ dy shkallët e tjera të gjyqësorit për masën e padrejtë që ishte dhënë ndaj klientit të tyre. E dërgojnë në Gjykatën e Lartë dhe shqyrtimin për ndryshimin e masës së dënimit. Kështu, pas tetë seancave të zhvilluara në Gjykatën e Lartë, Kolegji Penal i drejtuar nga gjyqtari Shkëlzen Selimi, ka argumentuar se aktiviteti kriminal i Lulzim Berishës është kryer në vitet 1998-2000 dhe ai duhej të dënohej me ligjin e kohës së kryerjes së krimeve. Në atë kohë, pra në vitet `98-2000, vrasja me paramendim dënohej me maksimum 25 vjet.

Gjashtë vjet
Aktualisht Lulzim Berishës i kanë mbetur edhe 6 vite burg. Ai është dënuar nga gjykata me 25 vite burg për krijim të grupeve strukturura kriminale dhe vrasje.
Redaksia Online
l.q/Shqiptarja.com



 

TAG:
• lulzim berisha
• edmond koci