Pas arratisjes spektakolare së Altin Ndocit, nga Spitali i Durrësit dy ditë më parë, dje nisi zhvendosja e të burgosurve me rrezikshmëri të lartë nga burgu i Durrësit drejt atij të Fierit, Peqinit dhe pjesën tjetër në burgje të tjera në vend.

Kështu pamjet e mësipërme tregojnë transportimin e të burgosurve nga burgu i Durrësit drejt burgut të sigurisë së lartë në Peqin. Siç shihet edhe në video të burgosurit janë transportuar nën masa të rrepta sigurie gjatë orëve të para të natës.

206 të dënuarit dhe të paraburgosurit që ishin në burgun e Durrësit u futën në “sitë” për të vlerësuar rrezikshmërinë e tyre. Ministri i Drejtësisë, Besfort Lamallari urdhëroi Drejtorin e Përgjithshëm të Burgjeve që të hartojë një plan të ri dhe të rishpërndajë nëpër seksione të burgosurit, bazuar në rrezikun shoqëror që kanë.

Pika më e rëndësishme e urdhrit, ishte transferimi i të gjithë personave me rrezikshmëri, që deri tani qëndronin në burgun e dalluar për ‘komoditetin e tij’, në një prej shtatë burgjeve të sigurisë së lartë në vend. 

Report Tv mëson se në një seksion të veçantë në Durrës, aktualisht ndodhen 27 personazhe të botës së krimit, të konsideruar të rrezikshmërisë së lartë, mes 54 të dënuarve dhe 152 të paraburgosurve gjithsej. Altin Ndoci ishte një prej tyre, ndërsa dallon edhe Lulzim Berisha.

Burgu i Durrësit njihet edhe si “burgu i VIP-ave”. Në këtë institucion kanë vuajtur masën e sigurisë dhe dënimin ish-ministri i Mjedisit Lefter Koka, ish-deputeti Alqi Bllako dhe ish-kryetari i Bashkisë së Durrësit Vangjush Dako, të cilët tashmë ndodhen në liri. Aktualisht, në Burgun e Durrësit vijojnë të qëndrojnë ish-deputeti Jurgis Çyrbja, kryetari i Bashkisë së Tiranës Erion Veliaj, ish-ministri i Shëndetësisë Ilir Beqaj, si edhe ish-zyrtarë të tjerë të lartë të akuzuar nga SPAK dhe në proces gjykimi.

Gjatë kontrolleve të zhvilluara herë pas here në këtë institucion janë gjetur edhe telefona celularë, të fshehur në ambientet e jashtme të burgut. Aktualisht, në të gjithë vendin ka 20 institucione të vuajtjes së dënimit, ndërsa 7 kanë seksione të sigurisë së lartë, si në Peqin, Fier, Korçë, Burrel si edhe institucionet 313 dhe 325 në Tiranë.

Alti Ndoci i dyshuar si pjesë e krahut të armatosur të organizatës kriminale të Çopjave të Elbasanit, i rekrutuar si vrasës me pagesë nga Talo Çela dhe i akuzuar në disa vrasje mafioze në vend u arratis më 13 janar duke shfrytëzuar momentin që forcat e burgjeve e kishin transportuar drejt spitalit për vizitë.

Ndoci cilësohet nga autoritetet si një personazh me rrezikshmëri të lartë shoqërore. Ndoci me origjinë nga Lezha dhe banim në Tiranë, është arrestuar nga SPAK në Tiranë 6 vite më parë gjatë operacionit “Plumbi i Artë”. Dëshmitë e disa bashkëpunëtorëve të drejtësisë e kanë përfshirë në disa vrasje të bujshme, mes tyre edhe masakra e Bradasheshit.