Grupi parlamentar i Partisë Socialiste pritet të zhvillojë nesër një mbledhje ku do të bëhet leximi i raportit të 5 anëtarëve të PS në Këshillin e Mandateve lidhur me çështjen e Belinda Ballukut.

Kreu i grupit parlamentar Taulant Balla u ka lënë porosi të veçantë të gjithë deputetëve për të marrë pjesë. Hartimi i raportit i është besuar kryetarit të Komisionit të Ligjeve Ulsi Manja, ndërsa prezentë në mbledhje pritet të jetë dhe Belinda Balluku.

Kryeministri Edi Rama do të mbajë një fjalim live ndërsa nuk dihet nëse dhe Balluku do t’i adresohet gjithashtu grupit parlamentar.

Pavarësisht se janë rezervuar për të shprehur publikisht qëndrimin, socialistët kanë lënë të kuptohet se me largimin e saj nga detyra, nuk ka arsye pse të jepet autorizimi për arrestim. Këtë pozicion ka mbajtur edhe kryeministri Edi Rama në mbledhjen me grupin parlamentar dhe ministrat, kur njoftoi ndryshimet në qeveri dhe largimin e Ballukut nga detyra për shkak të masës së pezullimit të vendosur nga GJKKO, që mbeti në fuqi pasi Gjykata Kushtetuese nuk doli dot me një vendim.

Në fakt, anëtarët e Kushtetueses vlerësuan njëzëri se ministri nuk përfiton nga përjashtimet e nenit 242 të Kodit të Procedurës Penale për masën e pezullimit. Por ata u ndanë në mënyrën se si kjo duhej realizuar, nëse duhet kërkuar apo jo leja e Kuvendi i Shqipërisë për pezullimin e ministrave.

Menjëherë më pas, shumica nxitoi të propozojë një ndryshim në nenin 242/2 të Kodit të Procedurës Penale, duke përfshirë ndalimin e pezullimit edhe për anëtarët e qeverisë, presidentin dhe drejtuesit e institucioneve të pavarura.

Seanca e 12 marsit do të vendosë për fatin e Belinda Ballukut. Tashmë PD e ka publikuar raportin e plotë duke bërë të qartë mbështetjen për kërkesën e SPAK. Ish-zv/kryeministrja Belinda Balluku është marrë  pandehur nga SPAK për ndërtimin e tunelin e Llogarasë dhe nën hetim për 7 lotet e Unazës së Madhe. Ndaj saj rëndon akuza e “shkelje e barazisë në tendera”.