Kërkohet ‘pezullimi’ i ministres Diella, aktorja Bisha padi: U shkel kontrata, të mos përdoret imazhi im! Dua dëmshpërblim 1 mln euro

Aktorja e Teatrit Kombëtar Anila Bisha, imazhi dhe zëri i së cilës përdoret nga Ministrja virtuale Diella, ka ngritur një padi përmes së cilës kërkon që të dhënat e saj të mos përdoren më nga avatari qeveritar, duke pretenduar dhe një dëmshpërblim 1 milion euro për dëmtim imazhi. Bisha thotë se ajo kishte rënë dakort që zëri dhe figura e saj të përdoreshin vetëm për modelin e asistentit virtual të e-Albanias.

***

Telashe të reja në horizont për kryeministrin Edi Rama dhe kabinetin e tij. Pas zëvendëskryeministres dhe ministres së Infrastrukturës Belinda Balluku, një tjetër anëtare e qeverisë rrezikon “pezullimin”. Këtë herë në telashe është përfshirë ministrja  virtuale “Diella”.

Aktorja e Teatrit Kombëtar, Anila Bisha, imazhi dhe zëri i së cilës, janë përshtatur për avatarin qeveritar, ka depozituar një sigurim të kërkesëpadisë në Gjykatën Administrative ku si palë janë Këshilli i Ministrave, Kompania Apel shpk, AKSHI dhe kryeministri Edi Rama.

Deri në përfundimin e procesit gjyqësor, ajo kërkon që të dhënat e saj personale të mos përdoren më. Ndërsa në padinë që do të pasojë në Gjykatë, Bisha ka parashikuar si objekt, dhe një dëmshpërblim 1 milion euro, për dëmtim të imazhit, si rrjedhojë e përdorimit të pautorizuar të të dhënave personale. E jo vetëm kaq, Qeveria, Akshi dhe Kompania Apel do duhet të paguajnë dhe kamatat ligjore mbi vlerën e dëmit të shkaktuar, deri në ekzekutimin e vendimit.

Aktorja Bisha shprehet se ajo ka patur një kontratë që imazhi i saj të përdorej vetëm si asistente virtuale për shërbimet në e-Albania, dhe se shfaqja e Diellës si minister, është bërë pa miratimin e saj dhe në shkelje të kontratës.

Sipas sigurimit të kërkesëpadisë, të cilën Report TV e disponon, aktorja ka firmosur më 3 dhjetor të vitit 2024 një kontratë me shoqërinë “Apel” “Për përdorimin e imazhit, zërit dhe figurës së artistes Anila Bisha”.

“Në dispozitat kontraktore theksohet se përdorimi do të jetë ekskluzivisht për Asisitetin Virtual në portalin e-Albania, dhe do të ndalohen riprodhime të tjera pa miratimin e posaçëm nga pala e dytë”, thuhet në kërkesën për sigurim padie. 

Në dokumentin dorëzuar në Gjykatën Admninistrative vihet në dukje se krijimi I avatarit të Ministres Diella është realizuar “pa marrë asnjë miratim paraprak të aktores Bisha për përdorimin e të dhënave, madje dhe pa e vënë atë në dijeni”.

Kur kryeministri e prezantoi Diellën për herë të parë në shtator 2025, aktorja thotë se është ndjerë tërësisht e befasuar kur ka konstatuar se avatari ishte ndërtuar sipas imazhit të saj.

Në dokument theksohet se në situatën e krijuar, aktores “i është sekuestruar çdo e dhënë personale (imazh e zë) që përbëjnë tiparet e jashtme identifikuese të saj, dhe, duke u përdorur në kundërshtim me ligjin, kanë krijuar një duplikat digjital të paditëses”.

Sigurimi i kërkesëpadisë ngre madje dhe shqetësimin për problemet që publiciteti i madh I Diellës, mund t’i krijojë Bishës dhe në profesionin e saj si aktore. "Realizimi i personazheve si pjesë e profesionit të saj do të ishte mjaft i vështirë, madje pothuajse i pamundur, kur imazhi i saj në public, njihet si imazhi i Diellës, ministres për Inteligjencën artificiale”, thuhet në kërkesën për sigurim padie. 

Ajo kërkon, përmes një sigurimit të kërkesë padisë, që imazhi dhe zëri i saj që lidhet me avatarin e Ministres për Inteligjencën artificiale të mos përdoren, deri në përfundim të procesit gjyqësor.

Rendit zhvillimet sipas orarit:

Të Fundit Të Parat